Den nos edicion di ayera 14 di januari, nos a elabora riba varios aspecto di e caso Ocean Z y Pais Aruba contra habitantenan di Malmok. Pero nos no a inclui ainda e veredicto cu a bira conoci den curso di dia 13.
Tabata un grato sorpresa pa mira con e hues den e caso aki a tuma e molester pa dicta catedra, boluntario of inboluntariamente, tocante proceso debido cu gobernacion mester tuma na cuenta ora ta trata peticion di ciudadano en general. Un aspecto hopi importante, ya cu e ta conta pa miles di peticion cu anualmente comunidad ta deposita den man di gobernacion. Esaki cu e speransa hustifica cu, despues di un proceso transparente, adecua y cu no ta tarda demasiado, nan por haya un si of un no, den e ultimo caso aki sigur uno debidamente motiva. Despues di e eventual no, nan mester tin un caminda legal pa por entrega nan apelacion di e decision negativo pa nan. Lamentablemente esey ta un storia poco positivo pa e ciudadano, pero ta demasiado pa inclui den e edicion aki.
Kico nos por siña di e caso den corte aki? Pa cuminsa, poco biaha ta mira un sentencia den cual e hues ta bay asina extenso den e materia aki di ‘due process’ cu gobernacion mester mantene. E caso ta cu e empresario/desaroyado di e proyecto a presenta un peticion cu el a haci na ministro encarga cu Desaroyo Teritorial, Infrastructura y Migracion, cu tabata contene e famoso ‘krabbel’ di e ministro como señal cu segun e ta un decision positivo. A base di esaki, y sin tin e permisonan necesario, el a cuminsa y caba construccion. Mientras tanto, e ministro a haya su mes confronta cu e menasa di e habitantenan cu nan ta bay corte cu e caso. E ora no mas, dia 8 di december 2015, ora cu e construccion a termina, el a manda un carta pa e desaroyado pa adverti cu e no tin permiso (ainda) pa construi. Pero durante henter e proceso di construccion, den e departamentonan concerni ni un musca no a bula y a laga e empresa traha trankilamente, den cara di henter Aruba.
Den e caso mes, unda e abogado di gobierno a ‘team up’ cu esunnan di e desaroyado contra e habitantenan. For di henter e actitud di gobierno mediante su representante legal ta resulta cu gobierno tabata apoya e desaroyado 100%, despues cu na inicio nan a trece dilanti cu nan a adverti e desaroyado cu e no por construi (ainda). Gobierno a opone tahantemente e paro di e operacion cu e habitantenan tabata exigi, hunto cu e desaroyado. Hues a dicta na fabor di e habitantenan den forma provisional na december y den forma definitivo den e caso sumario dia 13 di januari 2016.
Pregunta: pakico gobierno (en todo caso ministro encarga cu Infrastructura) ta apoya un desaroyado, cu a actua contra ley diferente biaha, uzando engaño entre otro, pa yega na su meta, manera awor ta resulta di ta e opinion di e hues den e caso aki? Ta pesey e hues ta yega na un prohibicion pa gobierno tambe, di e cambio di e destinacion di erfpacht, pasobra e peticionario a actua contra ley pa logra su meta. Tur esaki e ministro concerni a ignora ora cu dia 5 di januari, sinembargo e ta dicidi riba su mes pa otorga e cambio di erfpacht. Pa confronta corte cu un ‘fait accompli’y purba forsa e caso na fabor di e desaroyado?
Henter e asunto ta cuminsa realmente unda e ministro en cuestion ta haya cu e mes riba su mes por dicidi si den un cierto area por bin (boutique) hotel y den e caso di Malmok el a dicidi cu por. Cu den e henter e proceso e ta viola e ley cu e mester vigila (Landsverordening Ruimtelijke Ontwikkeling) no ta nada straño. Desde entrada di e gobierno aki ta purba ignora y paralisa e ley aki, cu nan ta considera un estorbo pa nan por dal bay manera nan kier. Ironia di bida ta cu un di e personanan cu a para na cuna di e ley aki ta e propio presidente actual di Parlamento, den pasado ministro responsabel pa ehecucion di e ley aki cu tabata producto di gabinete Oduber di cual e tabata forma parti. Nos ta contento di mira cu, aunke ta pa interes personal, e ta enfrenta su colega(nan) di partido. Su bon derecho pa haci esey.
Den un entrevista transmiti na TeleAruba riba 13 di januari, nos por a tende e ministro concerni confirma cu en berdad su firma no ta mas cu e inicio di e proceso administrativo, loke ta confirma loke e hues ta bisa. Esey ta e teoria. E practica ta cu e mes ta duna e desaroyado un copia cu su ‘krabbel’ pa e uza esaki pa dal bay cu construccion y ‘por arte de magia’ tur e ambtenaarnan balente ta hala atras. Esey ta e practica! Pero nan a topa cu e hues robes! Ta di spera cu esaki tabata e ultimo persona cu ta zwaai den corte cu ‘krabbel’!
