Un homber a sostene e grupo Estado Islamico pa varios aña for di un suburbio na Portland, Oregon, door di yuda e extremistanan mantene un presencia online cu a curasha atakenan y a busca reclutanan, segun agentenan federal y fiscalnan a bisa.
Hawazen Sameer Mothafar, kende a wordo aresta na november y su huicio ta programa pa cuminsa na januari, a produci y disemina propaganda y material di reclutamiento via plataformanan di rednan social, segun un acusacion di Gran Hurado.
Mothafar a declara su mes inocente di cargonan di duna sosten material na un organisacion terorista designa, y conspiracion pa duna e sosten aki. Mark Ahlemeyer, su defensor federal publico, a nenga di duna comentario.
E caso ta subraya e importancia di tin un presencia online, hopi biaha loke expertonan ta yama un ‘califato digital’ pa e grupo, cu pa fin di 2017 a perde mayoria di e teritorio cu a conkista na Irak y Siria y su califato auto-declara hunto cune. E grupo ta continua ehecutando y inspirando atakenan.
Intentonan di agencianan di cumplimento di ley pa elimina presencia online di Estado Islamico hopi biaha ta parce un wega di whack-a-mole. Un aña pasa, oficialnan di cumplimento di ley Europeo a elimina cuentanan y informacion vincula na agencia Amaq, cu ta transmiti propaganda y noticia pa e grupo. Pero luna pasa mas, Amaq a pasa un comunicado den cual Estado Islamico a tuma responsabilidad pa un tiramento na Vienna cu a cobra bida di cuatro persona.
Mothafar, kende tabata biba na Troutdale na Portland, ta acusa di edita y produci material al Anfal, un corant cu ta ‘propone jihad violento’ y ta ricibi su ordennan for di oficina central di medionan di Estado Islamico, conoci como Diwan, segun e acusacion.
Tambe a bisa cu Mothafar tabata trahando den nomber di e grupo desde sikiera 2015 te cu su aresto na november.
Jordan Reimer, un experto den contraterorismo cu Rand Corp., a bisa cu e aresto no ta parce di ta un golpi fuerte contra e grupo, pero tur persona cu ta yuda crea y plama su propaganda ta hunga un rol importante. “Propaganda di ISIS ta un componente enorme di loke nan ta haci”, segun Reimer, un ex-analista di inteligencia pa departamento di polis di ciudad di New York.
Reimer a bisa cu ta inusual pa un persona na Merca ta involucra asina profundo- y directamente den actividadnan online di Estado Islamico manera ta acusa cu Mothafar tabata.
Alrededor di 40 porciento di e 221 persona cu a yega di ser acusa na Merca te cu november di crimennan relaciona cu Estado Islamico tabata acusa di biaha of purba biaha den exterior. Un tercer parti tabata acusa di planea atakenan terorista domestico, segun programa di extremismo di Universidad George Washington.
Tambe ta acusa Mothafar di duna asistencia, incluyendo modera chat room priva, na Al Dura’a al Sunni, of Escudo Sunni, un organisacion di medionan di comunicacion pro-Estado Islamico basa riba internet.
Na 2016 el a habri un cuenta di Facebook pa un oficial senior di Estado Islamico kende actualmente ta den custodia na Irak, segun e acusacion, y tambe a distribui articulonan online cu a describi con pa mata y lesiona cu un cuchiu y a curasha atakenan.
Loren Cannon, agente special di FBI a cargo di division di Portland, a bisa cu gruponan extremista cada bes mas ta usa hermentnan online pa plama nan mensahe di violencia y den accionnan directo di intimidacion, hacking y acoso di persona.
“E componente digital ta increiblemente importante e dianan aki”, Cannon a bisa. “Mi ta kere ta importante pa hende compronde cu e extremistanan cu ta promove violencia ta utilisa internet y rednan social – esey ta e hermentnan actual pa purba di transmiti ideanan.”
El a nenga di comenta riba e caso Mothafar, maske anunciando e aresto, el a referi na Mothafar como ‘un figura lider den red di comunicacion di Estado Islamico’.
