Siman pasa tabatin un caso cu a haya hopi reaccion den medionan social di un menor di edad cu cuchiu den man mustrando con e ta bay hinca/mata un persona. Despues di un siman cu hopi reaccion den e caso aki, Director di Voogdijraad a bisa cu e no por bisa si tin e caso of no pero cu mayor of personanan preocupa por acerca Bureau Sostenemi pa investiga locual ta tumando luga.
Segun Aisca Berkemeyer Director di Voogdijraad a bisa cu nan no tin e caso di e video graba di e mucha homber menor di edad cu cuchiu den su man mustrando con e kier mata su padrastro.
Segun Sr. Berkemeyer e no a mira e video aki pues e no por bisa si tin e caso of no tin e caso. Normalmente si ta un hecho castigabel, e mayornan por acerca polis pa duna aangifte. Pues si un mayor ta wak cu algo asina ta sosode cu su yiu e por haci aangifte di esey na polis. Mayoria situacion, si mayornan mes kier proteha nan yiu, nan mes ta cana e caminda pa haci esaki o necesariamente door cu ta trata mucha e mester ta Voogdijraad. Si ta bisa cu ta e mayornan mes a haci algo, e ora un hende por meld esaki na Voogdijraad, pues ora cu ta ripara cu mayornan ta haci video di menor y ta pone riba Facebook. E ora Voogdijraad por bay wak kico ta kico cu e mayornan. Si mayornan mes a wak kico a sosode y nan kier actua, no necesariamente mester di Voogdijraad.
Den caso cu mayornan dicidi pa no actua a puntra Sra. Berkemeyer si tin algo otro cu por wordo haci. El a bisa si mayornan no ta actua, si pone Voogdijraad of Bureau Sostenemi por bay wak kico ta kico. Indicacion cu nos matutino tin ta cu famianan a bay busca informacion pa yudansa den e caso aki cerca Voogdijraad, pero a wordo bisa cu nan mester bay Bureau Sostenemi. Sra. Berkemeyer a bisa cu esaki ta cuadra cu informacion cu sa duna pasobra Bureau Sostenemi mester bay wak si tin sospecha di mal trato of abuso y e ora nan ta meld esaki door na Voogdijraad. Por haci esaki anonimo tambe cerca Bureu Sostenemi den caso cu ta preocupa cu e situacion, por medio di mustra e video y si tin nomber tambe por duna nan tur e informacionnan aki pa nan bay investiga.
A puntra Sr. Berkemeyer si e simpel hecho cu ta graba un mucha haciendo actonan asina violento cu cuchiu no ta un motibo caba pa bisa cu e hendenan rond di dje no ta apto pa wak pa un mucha. E prome paso ta Bureau Sostenemi como cu nan ta stel vast na principio cu si mester un proteccion pa e menor. Nan ta acera Voogdijraad kende ta bay wak mas leu kico mester wordo haci den e caso.
Situacion
Locual cu nos sa di e caso te cu aworaki ta cu, e mama di e mucha su padrastro a graba e video di e mucha pa mustra con comportacion di e mucha ta y su pensamento contra di su padrastro. E video aki a wordo manda pa mama di e mucha, kende a publica e video riba su pagina di Facebook. E mucha ta bibando aworaki cu su mama y e padrastro cu el a expresa comportacion violento contra di dje den e video. Mientrastanto yen persona a subi Facebook pa expresa nan preocupacion pa locual cu nan ta mira den e video y buscando atencion di autoridad pa actua.
