E fuente Hulandes NRC a divulga cu e ex korpschef Gerard Bouman a garantisa e 5 polis acusa den e caso di maltrato bruto cu a causa e morto di Mitch Henriquez, cu nan por keda cu nan trabou y lo no kita nan. El a haci e promesa momento cu e investigacionnan penal y disciplinario (interno) ainda tabata andando.
Di e 5 polis Ministerio Publico lo persigui solamente 2 di nan. A base di e investigacion disciplinario cu awor a keda cla cuerpo policial a dicidi di suspendi 4 di e polis acusa. E di 5 polis por cuminsa traha bek ‘den un ambiente mas apropia” asina e cuerpo a informa. Pero e cuerpo no kier comenta riba e noticia di NRC riba e garantia di e korpschef anterior, aunke nan ta confirma cu tin un mail entre e korpschef y polisnan acusa cu ta papia di esaki.
E famia di Mitch Henriquez ta den shock riba e ultimo noticia aki. Segun nan abogado e famia no a wordo informa oficialmente y mester a tende riba radio cu e investigacion interno a keda cla. Nan mes no a wak e rapport ainda. Banda di esaki e famia no ta contento cu e decision di Ministerio Publico pa trece solamente 2 polis dilanti corte. E famia ta bringando e decison aki ainda, asina nos partner den noticia, Ret Karibense ta informa.
Segun e fuente Hulandes NRC e korpchef Bouman a haci su promesa durante un encuentro riba 17 di september 2015. Nan a discuti e situacion den e caso anticipando e investigacionnan penal y disciplinario. Na e momento ey e korpschef a haci cierto promesanan, segun e declaracion di cuerpo policial. Aki por lesa e articulo completo (na Hulandes)
NRC tambe a publica un otro articulo riba e conclusion di e investigacion disciplinario: 4 polis a faya gravemente durante e detencion fatal di Mitch Henriquez. Aki por lesa e articulo completo.
