Polis a comete eror tras di eror durante e detencion di Mitch Henriquez na un festival na Den Haag juni 2015. Esaki ta e conclusion di dos experto cu hues comisario na Hulanda a asigna pa investiga e caso. E rapport ta cla y conclusionnan a sali den prensa.
Conclusion principal: e violencia contra Henriquez tabata ‘desproporcional, exagera y no profesional’.
E polisnan a comete erornan grave: nan a klem su garganta cu ya tabata algo cuestionabel. Tambe nan a uza forsa mucho lihe y a tarda cu cuido medico. Asina e expertonan ta conclui.
Un di e expertonan hasta ta papia di ‘tortura’. Pasobra banda di e klem y push’e abou y pone rudia den su lomba, e polisnan a spuit pepperspray den su cara. Mientras nan mag di spuit solamente for di un distancia.
Dado momento Henriquez no tabata move mas. Sinembargo e agentnan a carg’e den e bus di ME. Segun e expertonan esaki ‘nunca’ mester a sosode: e regla ta cu e polisnan mester a yama un ambulance.
Sinembargo nan a hibe warda di polis Zuiderpark y na final nan no por a haya un pols mas. Pero nan a warda 5 minuut ainda prome cu nan a cuminsa di reanima Henriquez. E Arubano a fayece dia siguiente.
Dialuna husticia na Hulanda lo dicidi si lo persegui e 5 polis envolvi.
