Update: Hustica a dicidi cu lo persigui 2 di e 5 polis. Lesa mas aki, entre otro un video cu e reaccion di e hefe di polis
E abogado di e famia Henriquez ya a informa cu lo bay apela pasobra kier cu tur 5 lo wordo persigui, esaki el a comenta na RTL Nieuws
Polis a comete eror tras di eror durante e detencion di Mitch Henriquez na un festival di musica juni aña pasa na Den Haag, Hulanda. Esaki ta e conclusion di dos experto riba ordo di hues comisario pa investiga e caso. E rapport ta cla y conclusionnan a sali diasabra den prensa Hulandes
E conclusion principal ta cu e violencia cu e polisnan a uza contra Henriquez tabata ‘desproporcional, exagera y no profesional’. Nan a comete erornan grave: nan a klem su garganta cu ya tabata algo cuestionabel. Tambe nan a uza forsa mucho lihe y a tarda cu cuido medico. Asina e expertonan ta conclui.
Tortura
Un di e expertonan hasta ta papia di ‘tortura’. Pasobra banda di e klem y push’e abou y pone rudia den su lomba, e polisnan a spuit pepperspray den su cara. Mientras segun reglanan nan mag di spuit solamente for di un distancia.
Dado momento Henriquez no tabata move mas. Sinembargo e polisnan a carg’e den e bus di ME. Segun e expertonan esaki ‘nunca’ mester a sosode: e regla ta cu e polisnan mester a yama un ambulance di biaha. Sinembargo nan a hib’e warda di polis Zuiderpark y na final nan no por a haya un pols mas. Pero ainda nan a tarda 5 minuut pa cuminsa reanima Henriquez. E Arubano a fayece dia siguiente den hospital.
Decision
Segun e informacion husticia na Hulanda lo dicidi dialuna awe, si lo persigui e 5 polis envolvi. E motibo dicon esaki a tarda asina no ta conoci. Ministerio Publico si a duna di conoce cu lo kier cu e investigacion lo tuma luga profundamente.
Aña pasa un otro rapport ya a sali caba di parti di Rijksrecherche cu tambe a conclui cu Henriquez a muri a consecuencia di e maltrato di e polisnan. Locual ainda no ta keda mucho cla ta dicon Ministerio Publico di Hulanda a saca un relato cu informacion falso despues e morto di Henriquez. Nan a rectifica esaki despues cu hende a cuminsa publica video riba red social cu ta mustra cu algo otro a sosode.
Atencion
Na Hulanda e atencion tabata hopi grandi. Hasta e aña aki a manifesta na Den Haag unda e organisacionnan tabata pidi husticia pa Mitch Henriquez. Aña pasa na Aruba mes tabatin un manifestacion (momento cu su curpa a yega nos isla) cu tabata atendi relativamente bon. Sinembargo por mira cu despues, ni for di gobierno, mucho atencion pa su caso. Fraccionnan den parlamento si a manda un carta fin di juni pa e minister di Husticia Hulandes pa pidi entre otro pa husticia lo cana e manera corecto. For di pueblo no tabatin mucho interes. E conmemoracion un aña despues su fayecimento a tuma luga den presencia di su 2 ruman muhe y un par di otro miembro di famia y amigo na su graf na santana di St. Anna Kerk Noord.
