Dos sospechoso principal den e caso di labamento di mas cu 46 miyon a sali dilanti hues awe mainta, esta Ramon Helgers (un di e doñonan di restaurant Madame Janette) y Rupert Genser. Hues a dicta cu e tratamento di cas por tuma luga riba 5 februari 2016. Esaki a base di informacion di fiscal cu ta bisa cu e investigacion no ta cla ainda. E investigacion ta enorme, tumando luga den diferente pais, entre otro Hulanda unda e otro sospechoso Hennie van Rey ya a bin dilanti hues, y tambe na Venezuela.
Husticia ta sospecha cu a transporta e miyones den 10 container den un periodo di 2 aña. E compania local Arubras tabata encarga cu e transportacion for di Hulanda unda e comerciante Van Rey a sconde e placa den cargonan di galiña. Na Aruba e dos sospechoso a percura cu e placa por bay su destinacion final, Venezuela. Specificamente pe hefe grandi Chichi cu nan tabata yama ‘Papa’.
Aruba a a pidi Venezuela pa traslada un otro sospechoso den e caso, esta De Sousa. Awe fiscal mester haya contesta.
Mas informacion por lesa mañan den Bon Dia Aruba, entre otro ‘saconan di placa bashando abou for di zolder’.
