Ayera mainta comunidad di Aruba a conoce e noticia cu e caso penal investigativo Diamante a cuminsa ora Landsrecherche a haci un entrada hudicial na e cas di un periodista na Papayastraat.
E caso Diamante ta un caso penal investigativo riba e supuesto malversacion di fondonan di Parlamento di parti di fraccion di partido POR, na unda cu e sospechoso principal ta e ex-parlamentario y ex-vice- presidente di Parlamento Allan Howell.
Manera ta conoci, e acusacionnan di mal uso di fondonan pa e fraccion a bira motibo pakico a baha e gobierno anterior di Gabinete Wever-Croes I di manera prematuro.
Ex-parlamentario Howell ta wordo sospecha di a viola seis articulo penal di Codigo Penal di Aruba, segun articulo 2:79 deelneming aan een criminele organisatie; segun articulo 2:298 verduistering door een ambtenaar, segun articulo 2:354 misbruik van macht/functie; segun articulo 2:356 kennelijk illegale vermogensvermeerdering tijdens uitoefening ambt; segun articulo 2:404 witwassen; segun articulo 68, paraaf 1 di Algemenen landsverordening belasting, het opzettelijk onjuist doen van aangifte inkomstenbelasting/premies volksverzekeringen.
Tambe a keda conoci cu Jacqueline Deborah van Putten ta sospechoso den e caso aki, segun el a viola e mesun articulonan aki bao e nomber di ‘Stichting Hunto Nos Por’ stichting di fraccion di partido POR cu tin adres na L.G. Smith Boulevard number 76, e mesun adres di Parlamento di Aruba.
Loke a causa mas conmocion ta e entrada hudicial cu Landsrecherche a haci ayera diabierna den oranan di mainta trempan na un cas di un periodista conoci cu ta fungi como gerente di E-Arubiano Productions & Media y cu ta testigo den e caso aki.
Di nan parti, e gerencia y administracion a duna nan banda di medaya na unda nan a expresa lo siguiente: “Inval den Papayastraat y na Venezuelastraat diabierna mainta, tabata relaciona cu investigacion den caso Diamante. Autoridadnan ta en busca di evidencia di e sospecho cu tin contra Alan Howell y Jacqueline van Putten di e Stichting di Partido POR. Durante cu nan tabata maneha e fundacion, tabata haci uso di servicio di diferente persona of compania.
E-Arubiano Productions & Media ta un agencia estableci pa casi cinco aña caba y trahando riba e tereno aki cu profesionalismo brindando servicio di PR & Marketing na diferente partido y politiconan, pero tambe companianan gubernamental y di sector priva, tanto na Aruba como internacionalmente. Den esaki sr. Alan Howell y su fundacion tabata un di su clientenan. Como un proveedor di servicio, mescos cu tur otro cu a haci esaki na e fundacion, lo haya bishita di autoridadnan den cuadro di e investigacion andando.
Den e caso specifico aki, autoridadnan tabata en busca di tur invoice manda pa e servicionan brinda. Tambe nan kier haya sa kico a wordo paga caba y cual invoicenan ta habri.
E bishita di autoridadnan tabata specificamente en busca di prueba contra e dos sospechoso y no contra E-Arubiano Productions & Media. Gerencia di E-Arubiano Productions & Media a coopera pa entrega tur e parti di administracion cu ta regarda e tema aki di caso Diamante”, nan a duna di conoce den un comunicado pa prensa.
