Den e caso Ibis nos por a nota bastante comentario cu ta bay den direccion di “laga esaki ta un les pa tur hende.” En general esey ta aplicable tambe, pasobra no ta solamente e politico den e caso Ibis a haci malo, sino tambe un bon cantidad di empresario cu a comete delito tambe, ofreciendo o en todo caso pagando pa haya fabor di e mandatario concerni. Ta di spera cu nan a siña di e problemanan cu nan a pasa aden, pa motibo cu nan no tabata dispuesto di cana e caminda cu tur otro hende mester cana. Sin embargo, caso dado nan no a siña, nan por bay purba nan suerte atrobe, pasobra keto bay nos no tin garantia ainda, di ningun manera, cu e practicanan aki ta pertenece na pasado.

E prome pa duna nos preocupacion pa esaki, ta e propio mandatario condena, cu ta sali pafo y ta bisa prensa cu loke el a haci ta practica normal di tur ministro… Esey por ta berdad, pero esey no ta motibo pa absolv’e. Ta manera ora bo ta core pasa den luz cora y polis ta para bo, anto bo ta bin cu e argumento cu tabatin centenares di hende a core pasa den luz cora y nan si por a sigui… E unico contesta, cu probablemente lo bo haya tambe, ta cu e agente ey no por gara tanto hende pareu, ta un pa un nan ta bay, “y abo, meneer, bo number a hunga awe.” No ta keda bo nada otro cu keda keto y admiti cu bo ta fout, paga e multa y sigui cu bo bida.

Di otro banda, ban supone cu esaki ta e ‘modus operandi’ standard di politico na Aruba, ta kico mester ta nos conclusion? Esey ta motibo pa aleha y laga politica sigui opera asina? Esey lo implica cu nos ta conclui cu ta imposible pa e situacion mehora? Y si esey ta berdad, anto nos mester conclui cu ta inutil pa purba convence e funcionario publico cu e mester actua di manera integro? Cu ta miho en berdad e percura pa e sali di e oficina suf di e departamento y percura pa e ta pertenece na e ‘dream team’ di un ministro, na despacho di e ministro, o miho ainda, sinta na cas anto presenta den vez en cuando ora ta necesario, pasobra banda di gana mas salario e por yuda e ministro organisa su ‘business’ miho y gana algo di ‘comision’ tambe?

Si ta asina, anto ta miho nos bisa e actual minister presidente pa e para e proyecto di Bureau Integriteit cu ta trata na duna guia na nos empleado publico con pa actua cu integridad. Y pa e no cuminsa mes cu e Camara di Integridad, pasobra nos no mester di un watchdog pa loke ta e proyectonan grandi, cu keto bay ta tuma lugar sin e debido escrutinio y supervision?

Nos ta comprende di e declaracion di e anterior ministro presidente cu e ta mira cu preocupacion cu lo tin ministro den e actual gabinete cu ta birando candidato pa subi e mesun caminda cu su colega ministro a bay, cu sin duda algun lo termina na Santo Patia? Por ta cu e tin razon, pero lo no ta bon pa de paso caba di investiga esnan di e gabinete anterior cu ta reuni varios topico interesante cu merece investigacion? Manera e comercio cu e otorgamento di tereno a para bira durante su gobernacion?

Sin embargo, si nos ta haya, y talvez e anterior ministro presidente tambe, cu ta importante pa bin cu legislacion contundente pa frena abuso y delincuencia di nos mandatarionan, pakico e nunca a atende e asunto aki, pasobra tempo cu nan a drenta gobernacion e tema aki, si nos no ta kiboca, tabata un topico urgente caba. Pakico nos no a mira nada den tur e añanan ey? Practicamente ningun ley di proteccion y integridad a keda completa den e añanan ey. Ley di Ombudsman a keda benta, ey di financiamento di partido politico, mehoracion di Comptabiliteitsverordening, ley di promocion di competencia comercial, y contra formacion di cartel, etc. E unico leynan cu nos a mira ta loke a bira realidad bao presion internacional, encuanto labamento di placa y financiamento di terorismo. Pero te awe no tin un cuadro drechi di supervision di p.e. fundacion, pasobra ainda no a pasa e famoso Boek 2 di Codigo Civil, cu awor ta drumi un soño comodo den man di e actual gabinete? E caso Ibis mes a ilustra con importante ta cu ta bin mas supervision riba e fundacionnan, pa cuminsa cu esunnan di caracter politico. Nos como ciudadano mester mustra comprension cu e pober politiconan ta sufri hopi bao di tur e tension y stress cu ta bin di e ciudadano cu ta bin pidi mil y un cos?

Si acaso ta asina mes, lo no ta bon anto pa nos bin cu ley cu ta ‘proteha’ e politico di tal forma, cu e no tin ‘molester’ mas di e ciudadano cu ta bin pidi, y a cambio ta dispuesto di duna? Basicamente esey ta e mesun ley cu lo a proteha e ciudadano contra politico corupto…

LJMADURO – 24-FEB-2019