Cu mas hende deteni y partido preocupa

E caso IBIS ta parce di bay den ‘overdrive’. Ayera Ministerio Publico a bolbe detene un persona, cu ta tramita permiso y ta alabes pareha di un asesor di hopi confiansa di e partido den gobierno. E nomber di e señora no ta asocia solamente cu asunto di tramita permiso di estadia, sino tambe den asunto di emision di tereno di gobierno. Un señal cu e investigacionnan di e autoridadnan hudicial a cuminsa extende den direccion di abuso cu tereno, cu tin demasiado tempo ta andando, sin mira accion hudicial den esaki.

En todo caso algun tempo pasa por a haya e señal cu e investigacionnan den e caso Ibis no a keda limita na e ‘ontheffingnan’ so, sino cu e emision final di permiso di estadia na Dimas tambe a bira obheto di investigacion. Logico, pasobra cu mas di 2000 ontheffing, tin mas di 2000 caso pa studia den Dimas tambe. Esaki ta trece e siguiente ministro bao luz di huicio; esun encarga cu permiso di estadia. Y no e so. Henter e gabinete ta carga responsabilidad, pasobra ora e ministro aki mester a saca su pion clave for di e servicio aki, el a nombra un bode como adjunct-directeur, cu poder di firma. Anto conseho di ministro a aproba e berguensa nacional aki. Cu e personal di e servicio a bay para pafo den protesta, naturalmente no a yuda. Pero esun cu a kere cu tur e cosnan aki por sucede, den nos cara, sin ningun berguensa, literalmente, sin un Reino Hulandes pa pone e asuntonan na nan luga, a resulta mal ekiboca. Pa prome biaha den hopi aña nos por comproba cu ta yegando un fin na e impunidad di robo y ladronicia na nivel mas halto den gobierno. Y esunnan cu ta kere cu Reino no tin derecho pa tuma paso, djis considera esaki: Nos ta papiando di e caso di corupcion mas grandi den historia di henter Reino. Cu mas di cincuenta hende envolvi, entre nan mas di binti (and counting…) como sospechoso, entre nan un ministro y un bon parti di su staff personal: secretaria, asesor, chauffeur…

E pregunta cu ta surgi, desde algun tempo caba, ta cuanto prome ministro Eman mes tabata sa di e delitonan sistematico aki. Ta e mes a declara cu mas di un aña prome, el a adverti e ministro encarga cu labor pa e pone un fin na e practica aki. Nos por kere cu el a haci esey, pero el a percura pa e ministro cumpli? Aparentemente no, sino e asunto no a bay den e direccion cu el a bay. E ora anto nos mester cuminsa pensa den direccion di complicidad. Tur empleado publico sa masha bon cu ora bo haya sa di algo contra ley den bo trabao, bo mester tuma paso pa denuncia esaki. Si no, bo ta bira complice y por haya bo den problema grave cu husticia. Den e caso aki, prome ministro a bay denuncia? Si el a haci esey, no ta conveniente como politico, pero como ciudadano, lo ta di aprecia. Pasobra ta tuma curashi pa bay contra e tendencia di bo propio hendenan pa solidarisa cu e ministro en cuestion. Si e no a hacie, y a limita su mes na comparti e sentimentonan di solidaridad cu su partidarionan, anto e tin un problema creciente di credibilidad como prome ministro; nos lo haya sa na su debido tempo.

Pero den tur esey, unda nos ta para, como Aruba? Nos tin eleccion dentro di par di siman, y e desaroyonan den e caso aki ta tira un luz scur riba e evento crucial pa democracia aki. Por bisa di un banda cu pueblo tin derecho di sa kico ta tumando luga den e caso historico aki. Pa e simpel hecho cu nan mester por sa pa ken nan ta bay vota. Bay eleccion pa vota pa un partido cu a yega asina leu den mal gobernacion, cu potencialmente mas di un ministro di e gabinete aki por mira castigo di prizon cay contra nan, no ta exactamente e emblema Inmaculada cu bo lo tin gana di mustra pueblo. Ademas cu na ningun momento, ni e partido, ni e gabinete no a bin dilanti pa admiti cu tin problema di organisacion y control riba integridad den varios departamento y cu mester atende e cosnan aki. Por cierto cu nunca, asina leu cu nos sa, nos a tende prome ministro expresa e palabranan ‘bon gobernacion’; en todo caso esey ta algo di cual nos no por acusa su persona, cu el a defrauda promesa haci…

Ta di spera cu pa dia di eleccion tin cierto claridad den e asunto aki, no na ultimo luga pasobra e otro partidonan den e contienda no tin arte ni parte den tur esaki. No pasobra no tabata existi corupcion den tur e gobiernonan anterior, pero esunnan cu a goberna a paga caba den forma di derota electoral den pasado. Pero atrobe nos ta trece dilanti cu nos no por continua den duna cualkier partido ‘carta blanca’ pa nan goberna na nan antoho den e proximo añanan. E cambio mester ta awor!