‘Desapunta den y rabia’ cu e proceso di Ministerio Publico (OM) contra dje. Ex- minister di Labor Paul Croes a duna awe mainta su prome declaracion dilanti corte. Prome cu esaki el a uza su derecho di silencio pa motibo di con OM a hiba e caso y tambe prensa cu a ‘guli sin nada’ e informacion duna di OM.

Interesante den e caso awe, cu tabata un regiezitting y no a tratamento profundo mes di e caso di corupcion cu permisonan laboral, ta cu su casa Melony Croes-Paesch tambe awor ta considera como sospechoso den e caso. Tin dos echonan cu OM a trece contra dje: e trahado ilegal haya den nan cas y labamento di placa.

Sra. Croes-Paesch tambe a duna un declaracion emocional den corte awe mainta. “Mi no sa dicon mi mester aparece dilanti corte, maske cu mi ta casa di Paul Croes. Pasobra den e 20.000 paginanan den e dossier di OM nan no ta menciona niun biaha mi nomber. Asina mi no por defende mi mes, mi no ta haya esaki ta husto. 2 entrada hudicial nan a haci den nos cas cu nos dos yiu chikito na cas. Nan a haya nada, niun placa, arma, droga.”

Caso menos grandi
Locual tambe a bira cla ta cu e caso cu inicialmente OM kier a trece dilanti unda ta mustra cu corupcion riba escala grandi a tuma luga cu mas o menos 900 compania envolvi no a resulta. 
Segun Paul Croes awor ta resulta cu ta trata di 15 compania so den e parti di permisonan laboral unda ta culp’e pa duna exepcion en cambio pa placa, servicionanan sea otro promesanan of fabor.

Ta trata mas tanto tambe di su fundacion Leadership in Excellence cu OM ta culp’e pa uza como plataforma financiero di ricibi donacionnan y uza e placa despues pa asuntonan personal. Entre otro paga su debe di estudio, asina a menciona den corte awe.

“Pero nos ta papia di un fundacion lanta prome cu mi a bira minister. Tambe ta papia entre otro di donacionnan haci manera cahanan di cerbes. Anto esaki supuesto mester ta e caso di corupcion di sieglo?”, asina sr. Croes ta remarca.

32 pa 41 testigo
Sinembargo den corte OM ta menciona cu tin 32 testigo awor cu declaracionnan unda tin prueba cu e corupcion tabata uno organisa cu un rol directivo pa Paul Croes y of lider di e organisacion.

Tin 24 sospechoso culpabel di entre otro abuso di poder, soborno, labamento di placa, estafa, falsificacion di documentonan y tambe participacion na un organisacion criminal.
Segun OM tin mas cu 60 ordner cu miles di documentonan y hopi audio di grabacion di combersacionnan entre otro di Paul Croes. Tambe tin Whatsapp y hopi otro prueba.

Na comienso Fiscal Gerretschen ta declara cu menoria di e sospechosonan ta durf di papia cu husticia. “Nan ta mustra curashi pasobra nos sa cu den un comunidad chikito esaki ta hopi dificil.”

Nan a critica e otro sospechosonan cu no ta bisa nada y no ta tuma nan responsabilidad. Entre otro Paul Croes cu manera menciona te awe no kier a duna un declaracion. Sinembargo esaki a cambia y awor sr. Croes a indica cu e ta willing pa bay den un verhoor. Bou condicion si cu e y su abogadonan ta haya na tempo e informacion necesario di OM pa defende nan mes adecua.

Caso final fin di aña
Hues a expresa su speransa pa fin di aña por cuminsa trata e caso. Awe mainta el a dicidi cu pa cierto sospechosonan, e ta necesario pa tin un di dos regiezitting tuma luga na september.

Asina OM ta haya tempo pa entrega ainda e resto di e dossier como cu esaki no ta completo ainda. Locual ta hopi importante ta e rapport financiero tambe pa mira exacto ken a malversa cuanto. Tur esaki no ta cla ainda locual tabata un di e kehonan principal di e defensa di 5 sospechosonan trece dilanti awe mainta. Banda di e pareha Croes, nan tabata Giovanni Capriles (tempo ey consehero di sr. Croes), Selma Arends (tempo ey secretaria di sr. Croes) y Roque Aparicio (tempo ey chauffeur di sr. Croes). Nan ta considera como e sospechonan principal den e caso Ibis.

Awetardi, mañan y diabierna e regiezitting lo continua.