Desde entrada di e gobierno nobo (gabinete Wever-Croes), e minister encarga cu infrastructura Otmar Oduber (POR) a dicidi cu e no ta bay honra e contracto di e compania Aruba Villas N.V. pa loke ta e edificio nobo unda DTI ta awo na Barcadera.

E argumento principal uza door di e mandatario ta cu e contracto lo ta nulo ya cu esaki a keda firma net prome cu e gobierno anterior a baha.

Ayera a tuma luga den corte un caso den forma di kort geding entama pa Aruba Villas contra di pais Aruba. Esaki ta paso cu gobierno lo no ta pagando huur segun e contracto cu tin entre e partidonan. Abogado di Aruba Villas, Ronny Wix ta splica Bon Dia Aruba cu ta trato di 3 pa casi 4 luna di huur cu gobierno no a paga, no obstante cu tabata paga prome sin problema.

E abogado ta splica cu desde a bin desacuerdo entre e partidonan, ta e minister mes a firma un contracto di prolongacion di 3 luna mientras ta discuti e diferente posibilidadnan di continuacion. No obstante esaki, gobierno di Aruba no ta pagando huur desde januari pa e edificio aki.

“Ta con bo por negocia cu un persona asina?”

Segun sr. Wix, e minister en cuestion a uza diferente argumento cual e ta categorisa sin base. A bay di bisa cu e contracto ta antidata, pa no a bay un destaho publico, pa no tin presupuesto pa paga huur y pa edificio no ta adecua.

Despues di a mustra e minister cada biaha, cu documento, cu e argumento(nan) cu e ta bin cu ne no ta cuadra cu realidad, finalmente el a dicidi di purba yega na un acuerdo cu Aruba Villas pa sea cumpra e edificio of e mueblenan, cual segun sr. Wix nunca e intencionnan tabata serio di parti di e minister si mira e actuacion.
“Prome tabata su hendenan a cuminsa riba Facebook cu un campaña contra di mi cliente, despues un di su parlamentarionan ta sali publicamente duna su comentario ongevraagd riba e contracto y pa finalmente e minister mes sali publicamente pa desacredita mi cliente”, sr. Wix ta bisa Bon Dia. E abogado ta puntra su mes, ‘ta con bo por negocia cu un persona asina?’

Caso den corte
Aruba Villas den corte a presenta cu documentonan unda cu ta mustra cu pa mas cu un aña y mey (1.5) gobierno anterior tabata den proceso hunto cu nan pa yega na un acuerdo pa e edificio na Barcadera, pues ta trata aki di un ‘doorlopende zaak cu a keda formalisa na september 2017’ segun abogado Wix.

Tumando na consideracion e postura di e minister, e retraso di huur y e falta di cumplimento di e contracto original, Aruba Villas a pidi corte pa obliga gobierno di paga e debe retrasa y alabes sigui cumpli cu pagonan di huur, te na momento cu un hues dicidi diferente. Corte a bay di acuerdo cu e peticion y gobierno despues di e caso a cumpli di biaha cu e retraso di 3 luna.

Abogado Wix ta haya ‘jammer cu gobierno lo kier bay un bodemprocedure paso esaki aworaki lo costa mi cliente placa pero nos tin e pleno confiansa cu e caso aki ta gana pa nos, pa cual motibo na final ta pueblo di Aruba lo mester paga pa un caso cu legalmente no tin niun base’.

Bon Dia Aruba a purba di haya contacto cu e minister en cuestion pa un reaccion, pero no a logra cu esaki, ya cu e mandatario lo ta den preparacion pa presenta awe den parlamento cu tratamento di presupuesto 2018.