E caso civil cu habitantenan a entama contra e dump ilegal na Tamarijn no a sigui.
Segun nan representante Luc Alofs, e motibo ta cu e abogadonan di ambos partido ta purbando di yega na un solucion en bes di bay hues. “Mi no si nan ta bay logra”, ta e ultimo informacion cu Bon Dia Aruba tin di dje. E siman aki mester tende mas di e resultado di e negociacion. E dump na Tamarijn ta formando un molester pa e habitantenan pa hopi aña caba. E luna aki e dump a pega candela causando problemanan grandi. Habitantenan no por a keda cas pa basta dianan y scolnan a cera. Tambe nan ta indica cu e huma a causa daño fisico, pero tambe no ta conoci e daño pa salud.
Husticia a cera e dump cu no tin permiso pa opera. E caso ta den man di Ministerio Publico tambe pa wak si nan lo bay actua contra e doño. Banda di esaki un grupo di habitante a dicidi di bay corte pa un caso civil. Pero despues manera bisa, a para cu e procedura aki.
