Un eventual caso grandi di hortamento, estafa y falsificacion di firma relaciona cu tramite di permiso di trabou ta birando un sneeuw bal grandi.
Tommy Leest di e compania Ox Employment Agency & Consultancy kende a sirbi di intermediario pa tramita permiso di trabou a declara na Bon Dia Aruba cu su bon nomber y esun di su compania a wordo perhudica, y e ta señala como responsabel directo na Nadine Melisha Buddy di e compania The New Odessey cu tabatin su oficina na Bernhardstraat 14.
Un caso cu autoridadnan competente, entre nan Ministerio Publico (OM) y Divisie Algemene Recherche ta na haltura di dje, pero nan no a actua ainda, a pesar cu denuncianan formal a wordo haci casi un aña pasa. Pero tambe porta a wordo bati di Dimas, DPL (departamento di labor) te hasta di Radhi Abdoel Khan kende tabata consehero di ministerio di Integracion, pa atende cu e asunto aki y nada a wordo soluciona.
Sr. Leest ta bisa cu e señora aki no cumpli cu e servicionan di tramite di permiso di su clientenan. Pero tampoco e señora no a entrega e placa bek cu el a dun’e pa haci e trabou aki. E ta un suma di mas cu 40 mil florin cu sr. Leest ta bisa cu a entrega e señora pa tramita alrededor di 9 pa 10 permiso di nan clientenan. Pero e denuncia aki no solamente tin di haber cu hortamento di placa, pero tambe di falsificacion di firma y documentonan. E señora aki –segun sr. Leest – te hasta a haci citanan falso na Dimas, y te hasta a falsifica su firma na DPL.
Bon Dia Aruba no a haya su version riba e acusacionnan aki ainda.
Ministerio Publico
Sr. Leest a yega di skirbi un carta pa Ministerio Publico cu fecha 22 di februari 2016, caminda el a señala cu na aña 2012 el a wordo acerca pa sra. Buddy kende a ofrece su servicio di tramitado di permiso di trabou, etc. Sr. Leest a bay di acuerdo pa haci uzo di su servicio ya cu e tabata hayando hopi cliente cu mester permiso, specialmente di origen Haitiano. Pero e mes no tabatin tempo pa haci esey, y el a prefera di brinda su servicio di intermediario ganando un comision.
Na cuminsamento e relacion aki a bay bon, pero despues tur cos a bolter. E ta señala cu e señora di un banda a cuminsa horta su clientenan for di dje. Pero tambe el a cuminsa haya un mal servicio, ya cu e sra. no a cumpli cu su clientenan. Pero ariba dje, el a cuminsa trata su clientenan malo, hasta varios relacion di amistad y confiansa cu e tabatin pa añanan a daña. Ademas e señora aki a cuminsa saca mas placa for di nan clientenan exigiendo cierto documentonan cu no tabatin mester. Pa ehempel el a cuminsa cobra pa cosnan cu Dimas hamas tabatin mester entre nan fingerprint pa hende cu ta bay saca prome permiso.
Cliente perhudica
Un cliente di sr. Leest perhudica ta Marie Elise Joseph, kende ta un señora di origen Haitiano di 63 aña, kende a crea un debe na banco sacrificando su pensioen pa entrega un suma di alrededor di 14 mil florin pa tramita dos permiso pa su sobrinonan.
El a declara na Bon Dia Aruba cu el a paga e suma aki na sr. Leest su compania pa tramita e permisonan di Nadege Corneille y Guerline Honores. Pero nunca e dos permisonan aki a bin cla y tampoco e placa a wordo entrega bek. El a cana diferente caminda entre otro el a solicita e servicio di e kantoor di Roos Gerechtsdeurwaarders pa bin cu un incasso y tambe di un abogado liber pa reclama su placa bek. Sinembargo abogado Roland Dijkhoff di e kantoor Legal Solutions cu ta representa su cliente Tommy Leest a declara na Bon Dia Aruba cu su cliente ta un intermediario, y esey ta para for di e carta cu sra. Joseph a firma unda e ta duna sr. Leest poder pa sali na su defensa.
“Mi cliente no ta tramita permiso. Mi cliente locual e ta haci of su negoshi mas bien ta cu e tin trahadonan cu ta haci trabounan sea pa hotel”, e abogado ta bisa. Mientras cu si un hende ta bay cerca dje pa tramita un permiso, e ta pone e persona na haltura cu e no ta haci e trabou ey, pero si nan ta interesa, nan mester dun’e un poder pa busca un compania pa haci esey. E abogado ta splica cu den nos ley ta trata di un caso di ‘lasthebber’ caminda ta wordo duna un encargo na un tercer persona pa e persona of lasthebber aki haci un cierto tarea pa bo.
Abogado Dijkhoff a indica cu esey tabata e encargo cu sra. Joseph a duna sr. Leest pa busca un compania pa tramita e permiso pa e famia di dje. Ta e mesun situacion di e otro clientenan cu sr. Leest a intermedia pa asuntonan di permiso di trabou E mesun argumento legal aki el a manda riba un carta cu fecha 26 di september pa oficina di Roos Gerechtsdeurwaarders & Incasso.
Tanten sr. Leest ta masha indigna ya cu sra. Buddy a logra den poco tempo daña su nomber, no solamente cerca su clientenan sino te hasta cu e companianan di utilidad Elmar y WEB unda a laga su debenan atras.
Leest a declara na Bon Dia Aruba cu e no sa cual porta bati mas pa e por haya un solucion satisfactorio pa su problema y esun di su clientenan.
Ministerio Publico y investigacion
Bon Dia Aruba a tuma contacto cu vocero di OM, Ann Angela pa sa con a para cu e caso di Leest, y el a bay check cu e fiscal cu tin Landsrecherche den su cartera. Tambe e lo recomenda sr. Leest pa yama e rechercheur na Landsrecherche cu a atende su caso of cu a traha e proces-verbaal. pa e haya sa con a para cu su aangifte. Nos a puntra si tin base legal pa OM procede den e caso aki? Riba e punto aki, el a laga sa cu normalmente ta spera pa Landsrecherche ta bin cla cu su trabao, y a base di esey ta wordo tuma un decision na ki manera lo sigui. “Te cu ta asina leu, no tin mucho cos eigenlijk cu nos por bisa”, e vocero di OM ta laga sa. “Mi ta spera cu mi no ta tocando ariba e porta di Ministerio Publico envano si mi berust mi mes ariba e articulonan di Wetboek van Strafvordering artikel 199 y articulo 201, y cu mi lo por pronto haya un reaccion positivo cu accion afirmativo tuma contra di e señora aki”, esaki tabata e suplica cu sr. Leest a haci na OM pa medio di un carta cu fecha 22 di februari 2016.
Caso ex polis Gibbs
E caso aki ta casi similar na esun di ex polis Gibbs, caminda 28 di november ultimo, recherchenan a bay over na detencion di e persona aki riba e sospecha cu el a comete delitonan cu ta empugna cu nos leynan penal. Delitonan manera falsificacion di documentonan of firma falso riba documentonan of tambe “oplichting” cu ta estafa. Sr. Leest a bisa cu su abogado y Landsrecherche a bis’e cu e caso aki ta cay bou di verduistering y cu esey si ta castigabel. Diahuebs ultimo, el a declara na Bon Dia Aruba cu a tuma contacto cu Landsrecherche pa haya sa kico ta pasando cu su aangifte. Na Landsrecherche el a haya como contesta cu ta fiscal ta esun cu ta evalua e relevancia di cada caso, y mirando e importancia di e caso, nan ta procede. E proces-verbaal a wordo traha dia 15 di april 2016, y ainda sr. Leest ta wardando pero nada ainda.
