Corte den prome instancia di Aruba a trata riba dialuna y diamars 22 y 23 di januari un caso penal contra cuatro persona, cu ta wordo sospecha di actividadnan bancario ilicito (ondergrondsbankieren) y labamento di placa. Hues lo dicta sentencia riba 6 di maart.
Den e caso aki- cu Ministerio Publico ta informa den un relato di a nombr’e “Hamburg”- cuatro persona di descendencia Chines a wordo persigui. Pa motibo cu nan tabata manda sumanan di placa desde Aruba pa China (principalmente). Pero di Aruba pa Sint Maarten y Anguilla tambe riba gran escala.
Tin di e sumanan aki cu tabata relativamente chikito, pero frecuentemente tabata trata di sumanan hopi grandi mes, Ministerio Publico ta informa.
Un di e personanan envolvi den e caso ta wordo alabes sospecha di tabata coordina transferencianan grandi di placa pa China y Aruba pa hende na Suriname, Colombia y Venezuela.
Es mas, tabata cambia sumanan di placa riba gran escala. Segun Ministerio Publico, comisionnan illegal tabata wordo gana cu e transferencianan y e cambiamento di cen. Dos di e sospechosonan tabata inverti e ganashinan aki den (entre otro) inmobilario of propiedad manera (por ehempel) tereno of edificio.
Evita cu sistema financiero ta wordo mal uza
Ley ta stipula cu actividadnan bancario, transferencia di placa y cambio di placa porsolamente wordo haci pa instancianan cu permiso of autorizacion di Banco Central di Aruba.
Esey ta pa crea un sistema di supervision riba trafico financiero, cu na mesun banda ta garantisa proteccion di e consumidor contra instancianan financiero grandi, y na e otro banda ta boga pa garantisa integridad di e sistema financiero.
Di e manera aki ta evita cu e sistema financiero di Aruba por wordo maluza pa personanan criminal,cu ta dispone di placa di procedencia sospechoso of dudoso y ta busca pa laba cen, segun Ministerio Publico.
Investigacion anterior tabata e caminda pa descubri caso Hamburg
E caso en cuestion di actividadnan bancario ilicito a sali na cla den un investigacion anterior di droga, den cual investigadonan a wak con e sospechosonan den e investigacion tabata haci uzo di servicionan di un di e sospechosonan den e caso Hamburg. E sospechoso aki tabata cambia placa pa e sospechosonan den e investigacion di droga of tabata manda cen afo pa nan.
Tambe a keda constata cu placa cash tabata wordo manda pa exterior, sin cu tabata haci denuncia na Aduana manera ley ta prescribi.
E ora a cuminsa un investigacion contra e sospechoso aki. Recherche Samenwerkingsteam (RST) tabata encarga, bao guia di Ministerio Publico. E investigacion a dura un aña y mey. Esaki a mustra cu dos di e sospechosonan tabata envolvi den actividadnan bancario ilicito extenso y transnacional.
Casi tur siman y pa periodo largo tabata manda sumanan di entre 500 Dollar pa 100.000 Dollar den exterior. Tabata cobra comisionnan di 5%, pero tin biaha te 8%, manera Ministerio Publico a constata. Por medio di esaki e sospecho tabata genera entredanan ilegal den cash hopi grandi.
Den cuadro di e investigacion a confisca sumanan den cash grandi durante ristamento di hogar di e sospechosonan. Cu e entradanan aki tabata cumpra y paga (entre otro) activonan fiho.
Ora tabata paga terceronan, tabata haci pago parcialmente den cash, por locual eventualmente e terceronan tabata deposita e placa bek riba cuentanan bancario di e sospechoso.
Siguientemente e activonan fiho tabata wordo paga desde e cuentanan bancario ey.
Asina tabata aparenta cu e cen tabata wordo presta di e terceronan, mientras cu enrealidad, e cen tabata di e sospechosonan mes.
Segun Ministerio Publico, ta pa e rason aki cu, banda di e sospecho di actividadnan bancario ilicito, a bin tambe e sospecho di labamento di placa.
A exigi castigonan di prizon y multanan grandi contra tur e sospechosonan. Hues lo dicta sentencia riba 6 di maart 2018.
Finalmente Ministerio Publico ta informa cu tin planea pa traha un informe pa gobierno, den cual e problema di actividadnan bancario ilicito lo wordo describi pa asina bin cu cuadronan dentro di cual e problema aki por wordo combati di manera structural.
