Ministerio Publico a informa cu recientemente a cera un acuerdo di transaccion den e caso Flamingo contra e sospechoso Humprey Anthony Croes pa un suma di Afl. 25.000.

Croes ta sospecha di a soborna activamente un trahado di oficina di minister di desaroyo espacial, infrastructura y medio ambiente (ROIM) den e periodo di november 2017 te augustus 2020.

E multa maximo cu segun Codigo Penal di Aruba por impone pa e delito aki ta Afl. 25.000. Por lo tanto, e total di e transaccion cu a acorda ta igual na e multa maximo.

Ministerio Publico ta opina cu tin suficiente prueba contra Croes y cu e hecho di cual e ta ser culpa por tambe comproba. Considerando tur hecho y circunstancia, incluso e hecho cu no tin victima of partinan perhudica di kendenan nan interesnan lo por ser perhudica door di realisa un transaccion, Ministerio Publico ta mira e transaccion menciona como un solucion adecua pa Croes.

Ministerio Publico tambe a tene cuenta cu acuerdo cera den casonan similar. Ministerio Publico ta di opinion cu e suma total di e transaccion ta haci husticia na e hechonan y na e rol specifico cu Croes a hunga den e caso penal Flamingo. Tanto Ministerio Publico como Croes ta considera cu e transaccion aki ta un solucion adecua di e caso penal.

Ministerio Publico ta enfatisa cu e transaccion aki no ta afecta e curso di e proceso penal contra e otro sospechosonan den e caso. Si Croes no cumpli cu e condicionnan cu a ser acorda, e tambe lo ser cita pa huicio.

Tabata dia 7 di juli cu Ministerio Publico tambe a informa cu nan a tuma su decision tocante persecucion di sospechosonan den caso Flamingo.

E investigacion Flamingo tin -en breve- di haber cu practicanan fraudulento tempo ex-minister O.O. tabata minister di ruimtelijke ontwikkeling, infrastructura y medio ambiente durante e periodo di november 2017 te december 2019.

Ministerio Publico na e momento ey a sigura cu nan tin planea pa cita 8 sospechoso, entre nan e ex-minister.

E hechonan castigabel cu lo a ser persigui ta estafa, maluso di poder, corupcion (activo y pasivo) y falsificacion.

Corte den Prome Instancia a wordo poni na haltura di e intencion pa cita e sospechosonan aki.