“Tin porfin un luz na final di e tunnel”, asina ex-minister Otmar Oduber a duna di conoce e siman aki a traves di un comunicado di prensa. Despues di a bay varios biaha corte y sali cu denuncianan di abuso cometi den e caso aki, porfin diamars ultimo corte a informa señor Oduber cu e tratamento di e caso lo inicia dia 17 di November y ta spera cu pa dia 2 di december esaki lo yega na un fin.
Na e momentonan aki ainda lo tin cu scucha algun testigo cu defensa di Oduber a pidi pa ser scucha y audiencianan aki lo tuma lugar den e siman di 26 di augustus, manera cu e reces di corte termina. Segun Oduber, esaki lo bira un siman sigur hopi interesante, pasobra pa prome biaha cu lo pone bao huramentacion, dilanti di un hues comisario, funcionarionan di Landsrecherche y RST di Hulanda cu den a caso aki a ser yama dilanti pa e defensa di Oduber, mirando cu lo a keda constata cu e rapportnan traha tabata completamente falso. “Mi lo a prefera claro pa e caso cuminsa mas prome, pero despues di ta wardando mas cu cuatro aña caba, e tres luna aki mi ta kere lo pasa lihe y asina mi por defende mi mes di e acusacionnan sin base aki”, asina Oduber a declara den e comunicado.
Algun siman pasa señor Oduber a denuncia tambe e hecho cu Ministerio Publico lo a laga haci un peticion na hues comisario pa tene e identidad di e polis Hulandes-Europeo di RST scondi, mientras no a pidi esaki pa esnan di KPA y Landsrecherche cu si ta Arubiano. Un acto cu e Oduber a considera un discriminacion y acto di sinberguensa di parti OM, pasobra, segun Oduber ta netamente e personanan aki ta esnan cu mester bin splica pakico a traha rapportnan falso y cu a conduci na henter e caso aki desde principio.
Den e rapport, Oduber a sigui bisa cu e ta convenci di cu e berdad lo sali na cla y cu e pesadiya aki por pasa pa pasado y asina sigui cu su bida y di su famia cu metanan nobo pa futuro.
