New York – E miembronan di e hurado selecciona pa husga e famoso narcotraficante Mexicano, Joaquin El Chapo Guzman, lo mantene nan status anonimo pa evita cualkier intimidacion, asina fiscalnan federal di Brooklyn a anuncia.
E hues Brian Cogan, encargo cu e caso, a duna e fiscal rason, cu tabata reclama e status anonimo pa e huradonan y proteccion pa cada un di nan durante nan trayecto di ida y buelta pa e tribunal.
E hues a dicidi esaki ya cu El Chapo, di 60 aña, como presunto lider di e cartel di Sinaloa, ta acusa di a dirigi sicario cu a realisa centenares di acto di agresion, secuestro y asesinato.
Basa riba e acta di acusacion y prueba ya examina pa e corte, e magistrado a añadi, “ta probabel cu e pruebanan di e huicio lo establece un modo tal di funcionamento di e acusado y su asociadonan cu un hurado por teme pa su siguridad.”
E hues a rechasa e argumentonan di e defensa, cu a sigura cu impone e status anonimo di e miembronan di e hurado por perhudica e presuncion di inocencia cu nan mester mantene.
E inicio di e huicio contra un di e hefenan narco mas grandi di historia a wordo pospone varios biaha y awor ta programa pa cuminsa na september. E proximo audiencia lo tuma luga dia 15 di februari, y ey ambos banda lo scoge e fecha exacto.
E ex hefe di e cartel di Sinaloa, famoso pa su dos escape espectacular di prizon Mexicano, ta preso den total isolacion na Manhattan desde su extradicion pa Merca dia 19 di januari 2017.
Mexico a dicidi finalmente pa extradita El Chapo despues di un di dos huida cinematografico di un prizon Mexicano, na 2015, a traves di un tunnel di 1,5 km largo y 10 metro di profundidad coba te na e salida di awa di su baño.
E ta acusa di 17 delito, entre nan di a dirigi un di e imperionan di narcotrafico mas grandi di continente Americano y di manda mas di 200 tonelada di cocaina pa Merca. E prome delito so, di dirigi e cartel di Sinaloa, por implica castigo di bida largo den prizon, pero El Chapo ta insisti den su inocencia.
