Hunta di Directiva di Caribbean Palm Village a suspende su miembro Daniel Maloof encuanto iregularidadnan financiero cu e hunta ta bisa nan a descubri. Siman pasa sr. Maloof a bringa e suspension aki den corte.
E mes no tabata presente sinembargo su abogado Jeannot de Cuba a defende su cliente, unda ta mustra a basenan di diferente documentonan (e-mail, notula) cu e acusacionnan contra su cliente no ta corecto. Tambe el a duna transcripcion di diferente combersacionnan graba cual entre otro ta mustra hopi cla, segun e abogado, cu tabatin un acuerdo den e directiva riba e parti di compensacion.
Sr. Maloof tabata funcionando como Supervisor di Operacion y tabatin e tarea di asuntonan financiero di e asociacion di Caribbean Palm Village. Segun e directiva e tabata ricibiendo 5 mil dollar pa luna, cual ta contra e Articulonan di Asociacion, pasobra compensacion na cualkier miembro di hunta mester wordo aproba pa su miembronan y no wordo determina pa e hunta di directiva. Awor abogado De Cuba a bin cu pruebanan, cu segun su cliente tabatin un acuerdo riba e pago.
E ta mustra tambe cu e acusacion di iregularidad financiero ta uno falso y cu e medida di suspension ta purba di evita cu su cliente por participa den e directiva nobo cu lo wordo eligi na juni durante e asamblea general di e miembronan. Su cliente Maloof tambe a postula su mes cual no a cay mucho na agrado di e otro miembronan, esta e presidente Edward Hayes, secretario Gabri de Hoogd y tesorero William Leo Buley. Segun e abogado nan kier pone su cliente un banda pa motibo cu sr. Maloof a critica e acuerdo pa traspasa derechonan di timeshare na e compania United Mergers and Acquisitions, un acuerdo cu e tres miembro a firma contra e statuut di asociacion di Caribbean Palm Village. Asina e abogado De Cuba ta pidi hues pa forsa e directiva pa hala e medida di suspension aden pa asina su cliente Maloof por reanuda su trabou. Nan ta pidi tambe pa pone un dwangsom di 10.000 dollar pa cada dia sin cumpli.
Abogado Ronald Wix a mustra den e defensa cu si tin prueba di iregularidad. Esaki Bon Dia Aruba ya a publica extenso den su articulo riba 11 di maart. Hues mester duna su veredicto ainda.
