Diabierna mainta a tuma luga e pre-huicio di Sr. Riera, ken ta sospechoso di a transporta 14 persona indocumenta na e isla. Ademas di e acusacion aki, e sospechoso ta acusa di a pone e bida di e inmigrantenan den peliger, mirando cu su boto y ekipahe tabata inadecua pa e biahe ilegal direccion pa Aruba.

E hues a cuminsa e pre-huicio cu algun pregunta pa e sospechoso, pa asina confirma tur e hechonan cu nan tin tocante e caso y e sospechoso. Riera a nace na Punto Fijo, Venezuela, y ta traha como piscado. Segun informacion di corte, el a ricibi huicio pa un ofensa relaciona cu transportacion di inmigrante no documenta caba.

Den e caso aki, Riera supuestamente a transporta 14 persona via un boto di piscado for di e costa di Venezuela pa Aruba. Segun e ta splica, el a tuma e riesgo pa haci e trabao aki pa asina por sostene su famia grandi di 5 yiu y un pareha ken su salud no ta den bon condicion. Na Venezuela, Riera tabata gana un maximo di 10 dollar pa siman.

El a sigui splica cu pa e trabao aki, e tabata di gana 500 dollar pa cabes. Den e transportacion aki el a ricibi 500 dollar pa un persona y lo a ricibi 800 adicional despues di su biahe back pa Venezuela, mientras cu e tabata carga 14 persona den su boto chikito. E informacion aki a causa un poco confusion, mirando cu si en realidad e pago ta di 500 dollar pa cabes, e pago total na su regreso lo mester a ta di mas di 800 dollar. Segun Riera a conta, e pago pa e transportacion aki a bini for di un persona yama “Tattoo” na Venezuela, ken ta e persona cu a reuni e personanan pa transporta, a paga e 500 dollar inicial y a provee e boto cu cual Riera ta di transporta e personanan en cuestion.

Tambe a subraya e hecho cu e nivel di siguridad pa e inmigrantenan tabata hopi abao. Den otro palabra, e boto y ekipahe tabata hopi inadecua pa nan por embarca riba e rumbo peligroso aki. Segun e sospechoso, tabatin dos safety vest so den e boto, y varios di esunnan transporta no por landa. Tambe e no tabatin GPS of telefon, pues si algo mester a pasa cu e motor di e boto, e pasaheronan no tabatin ningun manera pa tuma contacto cu hende of pa busca direccion.

Ora polis a logra detene Sr. Riera, ya e inmigrantenan tabata na tera na Aruba, pues e tabata su so caba. El a declara na polis prome cu el a transporta solamente cuatro persona, sinembargo riba tera a haya 14 persona cu el a transporta. Ora a puntr’e pakico el a gaña, el a confesa cu tabata pa e haya un castigo menos pisa. E inmigrantenan a ser descubri y a detene nan tambe.

Pa tur e delitonan cu e sospechoso a comete fiscal a argumenta cu en berdad e ta culpabel pa no solamente e crimen di transportacion di inmigrante no documenta, pero tambe pa e mal maneho di e biahe, cual por a facilmente pone e bida di 14 persona den peliger.

Pa esaki, defensa a argumenta principalmente cu e proceso di detencion di Riera tabata hopi mal maneha, ambos pa Warda Costa y corte. Den su argumento, e abogado di e sospechoso a declara cu Riera tabata victima di maltrato den detencion, den e forma cu e tabata den isolacion pa tres siman stret. Segun e abogado, esaki por causa problemanan psicologico, mirando cu ora un hende ta den isolacion, nan no tin contacto mes cu bida pafo, no ta permiti pa haci absolutamente nada y bo no tin contacto cu ningun hende.

Tambe el a argumenta cu corte ta contando e mesun caso dos biaha. Pues no ta berdad cu esaki ta su di dos ofensa relata na e tipo di crimen aki. Segun e abogado, a detene e sospechoso dia 1 di januari 2023 pa acusacion di traficacion di hende. Riba 17 di januari, supuestamente atrobe a detene pa mesun acusacion. Segun e abogado, esaki no a sosode.

Na final di e caso, hues a duna Sr. Riera e oportunidad di duna su ultimo argumentonan prome cu stipula e fecha pa e proximo huicio, sinembargo Riera no a duna ningun comentario, causando cu e hues a procede na stipula e siguiente fecha. Corte lo bolbe trata e caso aki den 3 siman, pues dia 26 di mei.