Minister di Husticia:
E caso di Paul Croes pa loke ta trata ‘retonan den gobernacion’ a causa hopi daño na diferente personanan cu awor inhustamente ta wardando riba permiso, pa motibo cu sr. Croes a bay over na bruha henter e sistema segun minister di Husticia Andin Bikker (POR) a declara ayera.
“E cos aki ta algo di lamenta pero ta un di e retonan cu nos ta enfrentando den e gobernacion akinan”, e ta bisa. Fuera di e tipo di criminalidad manera ladronicia/atraco, tin criminalidad cu ta mina e aspecto di un estado di derecho.
Ora cu bo tin por ehempel na gran escala corupcion ta tuma luga y esaki no ta wordo atendi cu ne. Segun minister Bikker, nan a tuma nota por ehempel den caso di sr. Croes. “E caso ta un di e ehempelnan cu ora riba gran escala ta bin cierto di e sospechonan aki, como estado di derecho mester percura pa persigui cualkier otro penalmente mescos ta persigui e homber chikito.”
Maneho estricto pa admision di permiso
Ministerio di husticia a keda amplia manera conoci cu awor tin e departamento di Dimas bao di dje. E ministerio a constata cu tin un retraso enorme di mas cu 5000 peticion pa permiso cu ta den espera pa wordo dicidi.
Tin un sistema cu yama Cirsa cu a costa 2 miyon florin cu tin su retonan di infancia anto esaki a hunga su rol den e retraso pa locual ta peticionnan pa permiso. Gobierno par di siman pasa a logra saca 1200 di e peticionnan aki y logra un 4000 adicional. Riba e website di Dimas por mira cu e CRV nummer si no a mira cu tin decision riba bo peticion pa mira den ki fase e ta.
“Pa subraya, no ta tur ora cu un peticion wordo duna ta automaticamente bo ta haya un permiso. Ta un peticion bo ta haci, y segun e maneho bo ta wak si ta bin na remarca si of no. Y lamentablemente tin biaha no ta tur ora ta bin na remarke pa esaki.”
E mandatario a sigui bisa cu e no ta bay den direccion cu minister anterior encarga tabata opera ‘unda cu kico cu pone su dilanti e ta firma aprobacion, desvia di maneho y te hasta tin biaha bay contra ley’. Minister Bikker ta bisa cu mirando e retonan grandi cu pais ruman Venezuela ta enfrentando, esey ta pone cu maneho mester ta super estricto. Minister Bikker: “Ta 100 mil habitante tin akinan, nos espacio ta limita y mester reforsa leynan hopi estricto pa loke ta trata admision.”
