Diamars ultimo,un video tabata circula riba medionan social den cual ta mira dos mucha ta golpia un adicto ambulante cu un palo. Ayera merdia a puntra Vocero di cuerpo policial, Liliana Rasmijn tocante e asunto y kico lo haci cu e dos mucha cu ta involucra den e incidente aki.
“Awe mainta nos a manda un comunicado cu nos ta na altura di e video cu ta circulando. JZP tambe ta na altura di esey. Desde mesun dia e trabou ta wordo haci conhuntamente cu Ministerio Publico, pa motibo cu nan ta esun cu ta guia e investigacion. Nos por bisa si cu e personanan ta conoci pa Polis”, Rasmijn a splica.
Segun Rasmijn, JZP ta ocupa cu e caso y nan no por duna mucho detaye, pero nan lo wak con e caso ta sigui. “Nos ta papiando di muchanan sigur ta menor di edad.” Ta conoci pa Polis kende e muchanan ta.
Den un caso asina nan lo yama e mucha, hunto cu nan mayornan, ya cu ta ‘papiando di muchanan di 12 aña di edad, un di nan sigur’. Sinembargo, Rasmijn a bisa cu no tin mucho cu por haci, y den casonan asina hende ta culpa mayor, pero ‘nos no ta ken pa tira culpa awo’.
Rasmijn ta bisa cu e ta spera cu e muchanan ricibi e mensahe cu locual nan a haci no ta bon, mirando cu ‘riba dje nan a filma esaki tambe’. Ta na su luga pa pidi un disculpa na e persona cu a wordo golpia. “Ban wak con e caso ta bay, pero mi sa cu e ta bou investigacion”, Rasmijn a finalisa.
