Awe ta bay tuma luga na Corte di Prome Instancia di Aruba e caso cu minister di Husticia y Asuntonan Social a entama contra e dos periodista di e programa Enfoke, Patrick Paskel y Nelson Cabral de Andrade.
Primeramente e caso tabata anuncia pa dia 7 di september pero despues corte a informa cu e fecha a cambia pa awe e caso tuma luga 2.30 di atardi, esaki ta considera como un caso civil hopi importante unda e minister Tjon a hiba e dos periodista corte pa difamacion.
Loke ta haci e caso mas interesante ta cu e periodistanan aki ta acusa Tjon di cambia proces-verbaal tempo Tjon tabata funcionario di polis di cuerpo policial, den un solo palabra, a cambia un proces-verbaal pa yuda su coleganan den cuerpo policial.
Libertad di expresion di miembronan di prensa na Aruba: articulo 10 EVRM
Na Aruba, vooral e miembronan di prensa ta gosa di libertad di expresion pero e no ta sin limite. Periodismo tin reglanan cu corte ta tene na cuenta cune entre otro “ Het beginsel van hoor en wederhoor” cu ta un principio di journalistiek cu, ora ta acusa un persona di algo, prome cu publicacion, mester duna e persona cu ta acusa, derecho di replica, derecho pa e defende su mes contra e acusacion.
E principio di hoor en wederhoor no ta absoluto. Un periodista por publica of acusa un persona sin cu duna e persona derecho pa replica si e tin un documento of otro tipo di prueba pa sostene su acusacion. Si e ta referi su mes na otro articulo, den e caso specifico aki manera e periodistanan di Enfoke a haci cu un articulo di e website Caribisch Netwerk unda a publica un entrevista di ex-halto comisario di Cuerpo Policial di Aruba Vanessa Tjon. Riba su mes ningun caminda Rocco Tjon su nomber a sali den e articulo aki.
Derecho di proteccion di un bon nomber: Articulo 8 EVRM
Tur ciudadano tin derecho di un bon nomber. Den e caso aki e acusacion cu Enfoke a haci contra Tjon no ta ora e tabata den calidad di minister pero si ora Tjon tabata polis. E ta un acusacion hopi delicado y fuerte contra su persona cu na momento aki e ta fungi como minister di Husticia cu ta un funcion publico y lo haci e caso aki mas interesante.
