Diaranson 22 di mei ta bin den Corte di Prome Instancia e caso contra Alberto Groeneveldt, kende a bira conoci den comunidad pa e lamentable suceso cu su cacho Khaleesi, kende a muri despues di maltrato y negligencia severo.
Segun Ministerio Publico (OM) a informa, ta acusa Groeneveldt di, den e periodo di prome di januari 2024 te 26 di maart 2024, varios biaha y sin ningun meta y surpasando tur loke ta permiti, a intencionalmente haci un bestia (un cacho di nomber Khaleesi) dolor y/of causa e cacho herida y/of a perhudica salud di e cacho, door di laga e cacho pa tempo largo mara na un cadena demasiado cortico y inadecua y/of a keda sin duna e cacho e cuido necesario, door di keda sin duna e cacho cuminda y/of awa pa e bebe y/of cuido pa su heridanan y/of remedi.
Ta acus’e di varios biaha, den e periodo di prome di januari 2024 te 26 di maart 2024, como doño di un of mas cacho, a keda sin cumpli cu su obligacion di duna e cacho(nan) aki e cuido necesario, door di duna e cacho(nan) insuficiente cuminda y/of di duna e cacho(nan) insuficiente awa y/of di keda sin duna e cacho(nan) cuido medico necesario di un veterinario y/of di keda sin duna e cacho(nan) suficiente espacio pa nan move.
Comunidad ta exigiendo husticia pa e caso aki, y ta spera cu autoridadnan por scucha e exigencia aki y duna un veredicto adecuado.
