Caso di Khaleesi a hala atencion di turista

Ayera na Corte di Prome Instancia por a nota un grupo chikito di turista wardando pafo mientras Corte tabata trata e caso di Alberto Groeneveldt, kende a keda sentencia pa negligencia di su cacho, cu a bira conoci den comunidad como Khaleesi.

Bon Dia Aruba a acerca e grupo di turista pa haya sa mas di nan posicion y opinion riba e caso. Tabata trata di un grupo di Hulandes y dos muhe Mericano.

E grupo Hulandes a conta Bon Dia Aruba cu nan tabata haya cu loke a sucede cu Khaleesi tabata “horible.”

“Pasobra boso tin e frase akinan, ‘One Happy Island,’ pero e no ta un isla feliz, no pa cacho. Ta hopi tristo y ta pone mi bira emocional cu hende akinan – no tur, pero al menos e guy aki – ta trata cacho asina malo.”

Nan a menciona tambe cu e caso di Khaleesi a hala atencion riba rednan social hasta na Hulanda, pues el a bira viral. “Mi a papia cu mi amigo y famia y conocir, y nan tur a bisa ‘un isla asina teribel, mi no ta bay eynan cu vakantie pasobra ta asina malo cu cacho.’ Pues pa Aruba, e ta atencion negativo.”

Tocante e sentencia, nan ta opina cu e sentencia ta zwak. “E ta un bon señal, pero solo un señal.”

E dos Mericano a expresa sorpresa pa e hecho cu a permiti Groeneveldt keda cu un cacho, y no a prohibie di tene mascota. “E tabata un di e casonan mas horrifico cu mi a yega di mira, y mi a haci rescate aki (na Aruba) y na Merca,” un di nan a conta. “Mi no a mira algo asina den henter mi bida.”

Tocante e sentencia, nan a expresa cu nan tabata spera lo a duna castigo di prison. “Precedente di prison lo tabata bon pa asina cosnan por bay dilanti aki na Aruba. Cosnan ta pasa hopi mas lihe na Merca… pero mi no ta sorprendi.”

“Tambe mester a prohibie di tin mascota,” e otro Mericano a comenta. “Mester a prohibie di tin cacho pa semper.” Nan a indica cu na Merca, den caso di maltrato di bestia, ta prohibi e persona di tin mascota. “Usualmente nan tambe ta kita tur nan bestia.”

Pa finalisa, el a bisa cu e caso aki ta un mancha riba reputacion di Aruba. “Mi no ni kier a bin ‘kinan mas. E unico motibo cu mi a bin ta pa scucha e caso.”