Diamars awor 14 di maart, basa riba articulo 15 di procesamento penal (strafvordering) ta bay tuma luga na HOF e caso cu e politico Candelario Ambrosio (Booshi) Wever a cuminsa contra ex-minister Otmar Oduber pa loke ta trata supuesto iregularidad den proyecto di insinerador chikito na dump di Parkietenbos.

E caso aki ta bin for di december di aña 2019 na unda Wever a bay Ministerio Publico pa entrega un denuncia contra e ex-mandatario y a entrega tur e pruebanan cu mester pa cuminsa haci un investigacion, incluyendo parlamentarionan, manera el a sigura, pero esey no a sucede.

Wever a informa cu na comienso di aña 2019 partido UPP a haci un peticion na Oduber pa entrega nan e copia di documentonan di onderhandse aanbesteding di insinerador chikito y nan a bay pa un procedura di LAR cu despues nan a haya e documento.

E ta sigura cu tabatin iregularidadnan rond di destaho publico pa loke ta trata e insinerador aki, cual tabata diseña pa exclui otro companianan di participa. Un insinerador cu segun e ta declara, el a bin sin dryer.

Despues nan a haya tempo pa studia y analisa locual nan a sospecha for di comienso: cu tabatin un abuso di poder. Pero tambe tin un cambio di cifranan, cifranan cu no ta cuadra precisamente cu e placa cu tabata disponibel na e momento ey, aumento di prijs pa haya casi tur 1.8 miyon florin. Esey a cambia e situacion cu ta bisa kico mester wordo haci y kico ta ofrece pa e solucion di kimamento di desperdicio medico.

Wever tambe a comenta cu un otro compania a sali miho y a cambia e procedura, a split e destaho publico papiando di insinerador chikito pero tambe e operacion di dje. Nan a pone un parti di insinerador cu DOW a cumpra y e otro parti cu Serlimar mester cumpra, pa motibo cu si nan a pone hunto e compania cu ta sponsor—segun Wever mes a bisa—e amigonan di Oduber lo a sali hopi mas caro.

“Eynan bo ta ripara claramente cu minister a haci mal uso di su posicion como mandatario pa privilegia un compania,” el a expresa.

Wever a sigura cu esaki ta bay contra ley y pa e motibo aki, el a entrega keho, na unda e tabata ta spera cu Ministerio Publico lo a haci su trabou pa mustra cu e tipo di cosnan aki no ta integro. Tambe e tabata spera cu Bureau Integriteit Aruba lo por a mira e tipo di cosnan aki, “cu realmente no por.”

Na mei di aña 2020, Bon Dia Aruba a haci un entrevista cu Wever na unda na e momento ey el a expresa cu “si Ministerio Publico ta bisa mi cu nan no tin motibo pa persigui Otmar Oduber, mi ta bay HOF.” Esaki tabata pa motibo cu e ta considera cu ta inaceptabel cu Ministerio Publico, cu tur e documento cu el a presenta nan, por yega na e conclusion cu no tin un ‘strafbaarfeit’ y awor e caso a bay te HOF pa nan por haci un investigacion.

Ayera, casi tres aña despues Wever a comenta cu “e proyecto di compra di insinerador chikito cu te awe, casi cuater aña despues no ta traha conforme e bestek cu a wordo entrega. P’esey mi a entrega e keho aki, m’a entrega tambe 4 carta di rappel na Ministerio Publico cu a stop di persigui cu 29 punto na unda cu detayadamente a mustra e casonan penal, no solamente Oduber pero ex-director di Serlimar, director di DOW y despues minister presidente cu ta duna e compania cu a haya e contract aki, pero e mes no ta haci nada. DOW ta opera e planta aki y segun por a compronde, te awe dia 10 di maart 2023, e no ta funciona manera debe ser y e compania cu mester paga e fuel, m’a compronde cu ni esaki gobierno ta paga, ta pueblo ta paga pa esaki, un cos hopi lamentabel y nos tin un presentimento cu Ministerio Publico ta protehando gobierno y Sr. Otmar Oduber den caso aki.” Wever a sigura.

E ta keda insisti den e carta cu e puntonan cu el a entrega detayadamente na Ministerio Publico y cu “nan a gaña mi bisando cu nan a manda e caso na Landsrecherche na 2021, pero m’a puntra basta hende na Landsrecherche y nan no a haya nada.”

Manera a keda conoci, Wever a trece dilanti den varios ocasion cu e tabatin aproximadamente 30 reporte na unda e tin un keho oficial. Tambe cu e ta kere cu algun cos a bay fout, di locual el a sigura cu “Otmar Oduber ta un corupto”.

“Te awe Serlimar no tin un administracion manera mester ta”

Na otro paisnan e servicio di recoge di desperdicio ta mara na otro servicio publico pa obliga hende paga, cu esaki ta bin e pregunta: “ta bira tempo pa Serlimar cuminsa cobra recibo di awa of coriente?

Tocante e pregunta aki, Wever a comenta cu esaki ta algo social cu si Serlimar ta funciona manera debe ser “cu no ta cambia director pa loco of mes cos cu aworaki tin tres director, tres persona cu ta gana e salario di director, te awe nan no tin e administracion manera mester ta y esey ta algo di lamenta, cu compania sui generis estatal no ta wordo maneha manera deber ser y mi ta puntra mi mes si nan realmente kier pa Serlimar bira pio? Pasobra con tur e tempo cu a mi tabata minister di Serlimar, no tabatin e problemanan aki, gobierno di e tempo ey a dicidi cu nan ta pone placa riba pasobra no kier a cobra e hendenan pero e momento cu gobierno a cuminsa cobra no ta duna subsidio mas, gerente no tabata cobra lo cual nan tin cu cobra y e missmanagement aki ta for di 2009 te awe y esaki ta sucede,” el a finalisa.