E caso di e baby di apenas dos luna bieu cu ta confronta complicacion serio, ta den boca di opinion publico. E mayornan ta desea pa nan baby lo wordo atendi afo, ya cu su situacion ta delicado. Ademas e baby a nace cu un problema di curason, y nan no kier core mas risico cu e criatura na Aruba. Sinembargo nan mester di aprobacion di AZV pa e baby lo wordo manda afo pa tratamento.
Bon Dia Aruba a tuma contacto cu AZV cu a informa nos cu e caso aki tin nan debido atencion cerca nan y e specialistanan. E organo aki a laga nos sa cu tur caso cu nan ta atende tin un procedura y esaki ta canando e procedura debido. Normalmente ta e specialista esun cu ta yena un formulario di peticion pa cuido medico den exterior. E peticion aki ta wordo trata den seno di un comision di specialista cu ta esun cu finalmente ta duna un conseho na AZV tocante tratamento medico den exterior.
Sinembargo ora cu ta trata di un menor, e mayornan tambe lo por haci un peticion, manera a sosode den e caso specifico aki. Nan a splica cu durante un combersacion cu nan a sostene diaranson ultimo cu e mayornan di e criatura, nan a splica debidamente e proceso. Igualmente pa medio di un comunicado di prensa cu AZV a manda diahuebs ultimo, nan a laga sa cu nan ta wardando riba e conseho di e comision pa asina nan por tuma un decision final si e baby mester wordo manda afo pa tratamento.
AZV a laga sa na Bon Dia Aruba cu no ta cuestion di falta di placa, etc… sino cu nan mester tene cuenta e consehonan di specialistanan te hasta nan a presenta e caso na dos specialista na Colombia, pa evalua si den su estado actual lo ta prudente pa move e criatura pa exterior sin core risico cun’e
Procedura cuido medico den exterior
Den pasado AZV a yega di divulga e procedura tocante cuido medico den exterior, te hasta nan a yega di publica un articulo den nan revista institucional, esta “Pulso”( Edicion 22 di luna di december 2014) rond di e topico aki. Den dje ta wordo splica cu Departamento “Medische Uitzending” di Organo Ehecutivo AZV ta encarga pa procesa cada peticion pa tratamento den exterior. Na momento cu e tratamento no ta of por wordo duna na Aruba y cu ta pidi pa un tratamento cu e ley di AZV ta cubri.
Ta importante pa cada asegurado ta na altura con e procedura aki ta cana. Entre otro cada peticion ta wordo trata door di un solo trahado di e departamento. Esey ta nifica cu di comienso te final di e proceso e asegurado ta wordo yuda door di e mesun persona. Si acaso e persona aki pa un of otro motibo ta ausente, e ora ta apunta un otro
trahado pa sigui cu e caso. Pa AZV un peticion ta nifica cu e specialista a yena un formulario di peticion pa cuido medico den exterior. Tambe e specialista ta agrega na e (formulario di) peticion un carta medico. Esaki AZV ta yama un peticion completo. Tin procedura pa peticion cu no ta urgente y cu a wordo aproba pa bay exterior. Pa peticion urgente (kiermen peticion por ehempel pa bay afo dentro di 48 ora) tin un otro procedura. Y pa peticion cu no a wordo aproba, tambe tin un otro procedura.
