E caso di tiramento fatal cu a sosode aña pasa riba 13 di september na Wayaca unda cu un dama nacionalidad Chines a perde su bida, a wordo posponi atrobe.
Lo trata e caso completamente riba 7 di december. E motibo ta relaciona cu asuntonan administrativo di parti di e defensa di e sospechoso principal.
Diabierna mainta e caso aki mester a bin dilanti pa wordo trata completamente. Sinembargo a presenta algun asuntonan administrativo di e abogado di sospechoso Steve Fan, kende no tabata presente den corte. Pues mester a bolbe pospone e caso aki cu ultimo ya a wordo posponi algun luna atras a. Locual nos a compronde for di abogado Chris Lejuez kende tabata defende Steve Fan, e sospechoso tabata kier a busca un abogado na Hulanda, esta Gerard Spong pa su defensa. Abogado Lejuez a hala atras pa sr. Spong tuma over e caso. E siguiente simannan sr. Fan mester regla su abogado pa e caso aki unda cu e lo mester haya su mes kisas ta hasta ta busca un otro abogado atrobe. “E caso aki ta hopi complica, bo tin mester di un abogado,” sr. Lejuez a comenta na Bon Dia.
Test psicologico
Manera nos a publica, fiscal a laga sa cu e sospechoso Fan a haya algun un test psicologo caba anto a recomenda pa haci e cu e otro sospechoso nacionalidad Boneriano tambe. A recomenda tambe pa pone e sospechoso aki bao di tratamento y mand’e pa un psikiatra por haci evaluacion di dje. No ta conoci ainda con esaki a sigui cual sigur lo ta un di e puntonan cu lo wordo discuti durante tratamento di e caso. Ora cu abogado Lejuez tabata na defensa di sr. Fan, el a pidi hues pa haci un rapport psicologico di su cliente pa motibo cu posiblemente esey por trece cierto puntonan na claridad cu ta importante pa defensa. Sr. Lejuez a expresa na nos e tempo ey cu: “Un psikiatra ta dicidi si un hende por para responsabel pa su actonan, y tambe si tin algo patologico of no bon cu e persona su mente. Un psicologo mas bien ta pa evalua e caracter di e persona y ki tipo di hende e ta.”
Acusa di asesinato
Ambos sospechoso deteni ta wordo acusa di asesinato cu nan a haci conhuntamente di e dama nacionalidad Chines S.S.K.F.F. door di un tiro den su cabes. Ademas di esey, sospechoso Fan ta wordo acusa tambe como complice di e otro persona den comete e mesun actonan aki. E sospechoso di nacionalidad Boneriano ta esun cu a tira pero sr. Fan ta wordo acusa di ta un complice den esey. Como complice e ta haya e mesun castigo cu esun cu a comete e acto mes. Sr. Fan ta wordo acusa di a yuda e otro persona cu cierto servicio y den cierto manera pa e otro persona bay comete e actonan aki.
1 aña despues
Ya nos a pasa un aña despues di e caso aki unda cu na prome instante no tabata mucho cla si e tabata un caso di atraco cu a bay robes. E victima den e caso aki tabata un dama di nacionalidad Chines inicial S.S.K.F.F. cu a ricibi un tiro den cabes cual a causa su morto. Despues di dos entrada hudicial, polis a pone man riba dos sospechoso. Esaki pues a pasa algun siman despues di e suceso unda cu na Pavia 52 a detene comerciante Steve Fan di Stevie Ice Factory como sospechoso. A detene un di dos persona tambe di nacionalidad Boneriano cu aparentemente ta traha pa Steve Fan. Na Pavia polis tambe a haya e pickup cu testigonan a mira ora a busca e sospechoso di e tiramento patras di veld di Sportboys na St. Cruz.
