Ayera mainta hues di Corte di Prome Instancia a pospone e caso di asesinato di Sayuri Petronia, debi cu rapport psicologico di e sospechosonan no tabata completo y awor mester yama psikiatra experto di Corsou pa bin Aruba y por traha e rapport aki.

“Esey ta nifica cu mi tin cu sigui lucha, pasobra bo no por mata un hende y bo ta kere bo ta get away gewoon asina”, Mike Petronia a comenta tocante e sospechosonan acusa di e asesinato di su yiu muhe Sayuri, kende na e momento cu e suceso a tuma luga, ambos tabatin 17 aña di edad.

Petronia a sigura cu ta un decepcion den sentido cu ayera mainta e caso mester a cera pa scucha e sentencia, pero el a keda posponi pa dia 26 di augustus. Petronia ta espera cu ley ta bay haci loke mester haci y duna e sentencia corecto, “pasobra niun hende ta den mi sapato, pero e dia cu nan ta den mi sapato, e ora ey nan ta bay sa cuant’or tin y esey ta conta pa tur hende”.

Di mesun manera el a menciona cu politiconan tin cu sinta y bin hunto pa cosnan por drecha den henter reino, “pasobra e no ta toca nan, pero dia cu e lo toca nan e ora ey nan ta bay cambia ley. Aworaki, nan ta trahando pa placa den nan saco so”, el a bisa.

Manera ta conoci, e caso lamentabel aki a tuma luga dia 4 di juni di aña 2021 na Flamboyantstraat, unda polis a haya notificacion cu un persona hoben di 20 aña di edad a ser haya na un cas cu un tiro fatal na su cabes.

For di e dia cu esaki a sucede, Petronia a cuminsa pidi husticia pa su yiu riba rednan social. Igualmente el a informa cu el a busca reunion cu parlamento, unda cu esey no a tuma luga. Tambe el a manda un carta pa Gobernador y tampoco a haya contesta, mientras cu Aruba a continua, cu casonan di tiramento a sigui tuma luga. Petronia a señala cu e kier sigui pone presion y accionnan tin cu sigui pa evita cu criminalidad ta continua aumentando na Aruba.

E mesun dia di e asesinato di Sayuri, dos persona di inicialnan “Z.C” y “I.P” ambos cu 17 aña di edad, a keda deteni en conexion cu e caso aki como e dos sospechoso principal.

“Z.C” tambe ta sospechoso den otro caso, y relaciona cu esaki, Petronia a asisti na Corte pa wak con e tratamento di e caso ey a bay, y asina duna di conoce cu e ta presente pidiendo husticia pa su yiu Sayuri. Tabata 26 di november ora Petronia a asisti na Corte y a bisa diferente medionan di comunicacion, cu aunke esey no tabata e caso di su yiu, e tabata eynan pa scucha. El a señala cu un persona di 17 aña por wordo acusa y sentencia como hende grandi, ta depende di e gravedad di e caso.

“Z.C” y “I.P” ta wordo sospecha di intento di homicidio, menasa, ladronicia cu violencia y posesion di arma di candela. “I.P” ta esun cu ta wordo acusa intencionalmente di tira mata Sayuri, na momento cu el a los tiro cu arma di candela riba dje, igualmente cu “Z.P”, kitando e bida di Sayuri.

Na februari di e aña aki e caso aki a cuminsa haya forma, na juni a trat’e di manera parcial, pero el a wordo posponi pa tres siman – segun e abogado di un di e sospechosonan a señala na e momento ey – pa motibo cu e psikiatra no tabata cla cu e rapport psicologico. Supuestamente a palabra cu lo mester a traha e rapport psicologico lo mas pronto posibel, pero segun e abogado a sigura, e cantidad di caso na e momento ey tabata halto y e cantidad di hende cu mester a haya ayudo tabata halto, lo cual ta haci cu e cantidad di psikiatra y psicologo na Aruba ta limita y no ta abarca e demanda cu tin. “E ta un problema cu nos ta topa basta frecuentemente y esey mi ta kere cu a ocasiona cu den e caso aki no a caba na tempo”, abogado Demis Illes, representante di un di e sospechosonan, a comenta.

Di su parti, Petronia ta sinti hopi preocupa pa motibo cu e no sa ki tipo di castigo e dos sospechoso lo haya, pa motibo cu e ta sigura cu nan a mata su yiu muhe y cu no tabata un accidente, manera un di e sospechosonan a comenta na corte.

“Nan por gaña, bula riba bin abao, haci kico nan kier. Dios sa cu nan a mata Sayuri Petronia” el a expresa.

Movemento #Sayu4Life, manera su tata a promove, ta un grupo di persona cu for di e prome dia cu e suceso lamentabel a sucede, a keda sostene e famia Petronia, pa motibo cu e casonan asina no por sigui na Aruba mas.

Sayuri Petronia tabatin 20 aña di edad ora el a ser asesina y segun su tata Mike a conta, den bida el a logra haya su diploma di EPB 1 na nivel di Economia.