Johnny Ponson di 65 aña a muri di forma violento na Amsterdam dia 30 di maart ultimo, y su caso ta yen di misterio, segun website De Telegraaf a informa dia 30 di april ultimo.

E homber cu a nace na Aruba a ser haya morto den e prome piso di flat Gravestein na Amsterdamse Bijlmer.

Folkert van Dekken, kende ta e lider di ekipo di investigacion di Polis cu ta investiga e crimen, a bisa cu “ainda nos tin hopi pregunta tocante e victima y tocante su bida.” Ademas a agrega cu “Ponson tabatin un bida relativamente retira. E no tabata sali hopi biaha for di cas, pero e tabata yuda su bisiñanan di bario. Asina el a yuda dies persona cu nan declaracion di belasting,” Van Dekken ta bisa.

Ponson ya tabatin varios aña caba bibando den e flat na e prome piso di flat Gravestein. E no tabata traha mas, pero e tabata yuda hende pa pagonan di tarifa y yena nan declaracion di belasting.”El a haya pago pa esaki. Hende tabata yama na su cas y e tabata yuda bo,” e lider di e investigacion di polis ta bisa.

Ademas el a sigura cu Ponson tabata biba su so, pero tabatin tres yiu cu dos muhe. “El a nace na Aruba y tambe a biba un tempo cu un amiga Colombiano na Colombia.”

Diasabra 30 di maart, dia cu e caso a bira conoci, un persona conoci di Ponson a señala cu el a sinti cu algo no tabata bon. E victima a pidi cuminda na comienso di siman y mester a busk;’e den fin di siman, sinembargo, e no a bay busca esaki. Un otro persona tabatin un cita cune e mesun diasabra, y diadomingo el a bay te su cas, a bati na su porta pero niun hende a habri e porta. Esaki tabata algo straño pasobra e victima normalmente tabata na su cas. Asina cu e conocido a alerta Polis, cu despues a haya su curpa, segun Van Dekken a comenta.

Debi na importancia cu e investigacion aki tin, segun De Telegraaf ta señala den su articulo, Van Dekken no por bisa di kico e persona aki a muri. “Ponson a permanece morto den su cas durante algun tempo,” el a afirma.

Polis ta indica cu nan tin diferente scenario, sinembargo, Van Dekken no ta comenta si algun obhetonan di e cas di Ponson a desaparece. “Ponson tabata biba su so y tabatin un bida aisla. E tabata un homber cu tabata mantene su apartamento limpi y na ordo,” e investigado ta bisa y tambe a agrega cu e ta spera haya contacto cu mas hende pa haya sa mas di e bida di Ponson.

“Nos ta buscando personanan cu a wak of a papia cu Ponson prome cu 30 di maart, pa nan ta testigo y presenta pa por resolve e caso aki,” Van Dekken a expresa.