Caso di abuso online mas grandi na Hulanda marca pa extorsion di mas di 100 mucha muhe

(NLTimes) – Un homber di 24 aña di edad di Etten-Leur ta sospechoso di extorsiona mas di 100 mucha muhe menor di edad. El a seduci e muchanan aki y a manipula nan pa manda imagennan sunu na su persona, cual despues el a usa pa extorsion e muchanan aki, segun Ministerio Publico a anuncia riba diahuebs na Breda.

E fiscalnan a bisa cu esaki ta e investigacion mas grandi cu a ser conduci na Hulanda tocante e abuso di menornan online. E sospechoso, Gianni de W., a usa rednan social pa acerca na e victimanan segun Ministerio Publico. El a tuma contacto nan usando un nomber falso, Bryan.snapx, Bryansnelgeld y otro variantenan unda e nomber Bryan a ser usa.

Cuerpo policial a haya mas di 150 map cu nomber di diferente mucha muhenan riba su computer. Algun di e mapnan aki tabatin miles di imagen di un victima en particular, segun e fiscal publico. “El a haci e bida di e victimanan un fierno.”

Cuerpo policial te ainda no ta cla cu e investigacion. E identidad di decenas di hobennan te ainda mester keda determina. E victimanan ta mas tanto menornan di edad y ta biba den henter e pais. E investigacion a cuminsa cu e reportahe di un hoben na Noord-Holland di 15 aña di edad ken a reporta cu e sospechoso ta extorsionando su persona. Ministerio Publico a declara.

Tambe a reporta cu e tabata un caso di extorsion sexual, cual ta considera extorsion cu ta trata imagennan of videonan sexual di e victima. Mas potretnan explicito of videonan sexual ta ser demanda for di nan como parti di e proceso di extorsion. E sospechoso tambe aparentemente a pidi un di e hobennan pa tin relacion sexual cu su pareha y graba esaki pa e sospechoso.

E ‘sextorsion’ aki a tin un impacto grandi den e bida di e victimanan. Un di e victimanan tabatin solamente 13 aña. “El a reacciona den panico, miedo y di manera emocional. Esaki a empeora su relacion cu su mama, ken desde e tempo aki a fayece,” OM a revela.

E identidad di algun victima te awo a ser determina. 8 mucha muhe a entrega acusacionnan contra e homber, sinembargo cuerpo policial ta premira cu e cantidad aki lo aumenta considerablemente. E sospechoso a ser aresta dia 11 di october y a permanece bao custodia desde e tempo aki. E lo permanece deteni pa 3 luna adicional mientras cu e caso ta bao investigacion, segun loke corte a dicidi. E gran cantidad di material pornografico involucrando muchanan a ser haya riba W. su computer.