E desorden genetico ta conoci como pseudohermafroditismo. Ora cu e mucha a haci 12 aña y ta drenta den proceso di adolescencia, hopi mucha muhe di e pueblo di Salina, na sur di Republica Dominicana, ta cuminsa haya  un penis den crecemento.

No ta un suceso aisla. Segun cifranan,  un di cada 90 muhe di e poblacion di Salina ta pasando den e proceso di haya sa, kico ta nan sexo en realidad, si  ta un homber of muhe. Na e pueblo ey,  nan ta conoci como “Güevedoces“. “Ora cu mi tabata un mucha chikito, tempo cu mi tabata bay mi scol, mi famia tabata bisti mi cu un bisti, pero mi no tabata gusta paña di mucha muhe,  ni cos di hunga di mucha muhe. Semper mi tabata gusta hunga cu mucha homber,” Jhonny, di 24 aña a splica. Awor Jhonny tin un  fisico y  un desaroyo biologico di un homber, pero tempo cu el a nace, e tabatin algo hopi similar na un vagina. Su progenitormnan a yam’e Felicita.

Ora cu su penis a cuminsa crece, varios homber hoben tabata harie y el a bringa cu varios di nan. “Nan tabata bisa cu mi tabata un diablo of otra cos asina, cos mahos, palabra sushi, y mi no tabatin otro opcion cu cuminsa bringa, pasobra nan tabata crusa mi linea”.

Dicon e situacion aki ta presenta?
Na momento di concepcion di un ser humano, esun cu ta  mucha homber tin un cromosoma XY y esun cu ta mucha muhe tin cromosoma XX. Durante prome par di dia, e feto di tur dos sexo ta crece igual. Na zona di mey mey di nan pia, e feto  tin un tuberculo solamente. Alrededor di 8 siman di gestacion, e cromosoma Y , di mucha homber lo cuminsa cu e segregacion di un hormona, cu ta conoci como dihydrotestosterona, y na e momento ey e tuberculo ta bira manera  un pene. Contrario na e mucha muhe,  no tin hormona di dihydrotestosterona, y p’esey e tuberculo ta bira un clitoris.

Pero algun homber no tin  presencia di un substancia  conoci como “5 alfa reductasa”, cu ta e hormona cu ta laga e testosterona cambia  pa dihydrotestosterona. E condicion aki ta sucede hopi biaha na Salinas, p’esey hopi mucha ta nace sin testiculo y sin penis. Nan ta nace cu algo similar na un vagina.

Ora cu nan ta yega na adolescencia y nan ta crece,  e nivel di testosterona den nan curpa ta aumenta y  finalmente ta cuminsa e crecemento di nan organo reproductivo, nan ta cuminsa haya organo reproductivo masculino y  asina nan  lo ta  haya sa nan condicion sexual berdadero.