Dialuna ultimo, e caso penal Avestruz a continua den corte, esaki ta referi na diferente investigacion cu Landsrecherche bao guia di hues-comisario den cooperacion cu Cuerpo Policial di Aruba y RST (Recherche Samenwerkingsteam).
Esaki den cuadro di un investigacion di Landsrecherche tocante delitonan di corupcion cu posiblemente a wordo cometi rond di entrega di terenonan di gobierno entre 2009 y 2017.
Den caso Avestruz, tambe ta investigando e posibel rol di e ex-minister Oslyn Benito Sevinger (Benny) y ta dirigi riba e pregunta si companianan a haya derecho di erfpacht a base incorecto.
Oficialmente e caso a cuminsa na luna di september unda cu pa varios dia e diferente sospechosonan a acudi na corte pa nan wordo interoga tocante e fundacion Curason Berde.
Dialuna ultimo 24 di october, manera e website local di NoticiaCla a informa corte a reserva 3 dia di e siman aki pa trata e caso di por lo menos seis sospechoso, reparti den dos pa tres sub-caso. E sub-casonan aki ta wordo yama Elenath y Deshaun unda den un ta bay wordo trata e transaccionnan di terenonan reparti den varios luga rond di e isla y ademas con a wordo usa medionan ilegal pa cierto personanan por a adkiri un di e terenonan aki na cambio di algun beneficio.
Pa luna di november lo trata e sub-casonan Damira y Bucuti cu otro sospechosonan ademas di Benny Sevinger cu otro asunto pa loke ta trata labamento di placa y malversacion di fondonan.
Na luna di december specificamente dia 12 tur sospechoso mester presenta pa trata e aspectonan personal y dia 14 di e luna aki ta bay cera e caso pa finalmente pone un fecha pa sentencia final, loke por ta posibel cu pa final di aña of comienso di 2023 lo tin un sentencia di e caso aki.
