Aruba Birdlife Conservation a topa cu un otro desaroyo inespera den locual ta nan pelea pa naturalesa. Diamars mainta na prome instante abogado Sr. Rudi Oomen a haci un apelacion pa cambia e hues pa motibo cu a ripara cu e hues cu ta tratando e caso a ‘Like’ e pagina di Facebook di Aruba Birdlife Conservation y ta aparentemente sigui esaki tambe pues e ta crea un impresion di simpatia pa ABC. Despues di un rato di deliberacion, e hues a acepta e apelacion aki pa pospone e caso pa no mas largo cu otro siman anto busca un otro hues cu preferiblemente no tin un pagina di Facebook.
Diamars mainta Aruba BirdlifeConsevation tabata den corte pa trata e caso contra desaroyadonan di proyecto Condominium Azure. Esaki ta e proyecto di ‘PGM Condobuilders’ cual ta riba tereno bisiña di Blue Residence na Bubali. E caso a keda posponi pa motibo cu segun abogado di PGM Condobuilders, Sr. Rudi Oomen a trece pa dilanti, e hues Sr. Winfield a ‘Like’ e pagina di Facebook di Aruba Birdlife Conservation cual ta duna nan un impresion cu e hues lo tin mas simpatia pa nan pa motibo cu e ta no solamente fanatico di naturalesa pero cu simplemente e ta like y sigui e pagina di facebook di ABC.
Ta haya cu hues no ta imparcial
”Hopi recien nos a tende cu tin cierto argumentonan pa haci un peticion awe pa pidi e hues pa un otro hues haci e caso aki. Door di publicacion di Facebook y e hues en cuestion, mi clientenan por a haya e impresion cu e no ta completamente imparcial den e caso aki.” Sr. Oomen ta splica Bon Dia. Sr. Oomen ta agrega cu como e hues a proclama su mes un amante grandi di naturalesa, cual e ta agrega cu e ta kere nos tur ta, sinembargo riba dje e ta sigui e pagina di Facebook di ABC anto eynan ta haya cu el a bay mucho leu. ”Ta duna un impresion cu tin mas simpatia pa ABC, e no kemen cu e ta asina pero un impresion ta suficiente pa haci un peticion asina.” Sr. Oomen ta bisa. Un dia exacto no a wordo duna ainda pero hues a propone pa no mas tarda cu otro siman pa sigui cu e caso despues cu nan logra di haya un otro hues cu den e caso aki, no ta un fanatico di Aruba Birdlife Conservation of tin un pagina di Facebook riba su mes manera hues Sr. Winfield mes a indica.
Apelacion pa un otro hues ta algo iregular
Segun presidente di ABC, Sr. Greg Peterson, e caso aki ta wordo tuma hopi na serio y despues cu e hues Sr. Winfield mes a refleha riba esaki, aunke cu e hues ta bisa di no ta pensa mescos,ta haya cu en berdad esaki por a duna un otro impresion pues ta respeta e decision pa pidi pa un otro hues trata e caso. ”El a desafia e hues cu e no por ta imparcial. E apelacion pa un otro hues ta algo cu no ta sosode hopi, e ta algo iregular. Mi ta spera pues cu no tin mas hues cu ta riba ningun otro forma di social media pasobra si no bo ta ‘out’ ” Sr. Peterson ta bisa Bon
