Ayera e caso penal yama ‘Abielu’ a wordo trata contra e homber O.A.T.H. di 65 aña di edad. T.H. ta wordo acusa di a regla actanan falsifica di matrimonio riba escala grandi y pa pago durante un periodo di mas cu shete aña.

E actanan falso aki a wordo siguientemente usa pa regla inscripcion di matrimonio na Dienst Burgerlijke Stand y Bevolkingsregister (Censo). Di e manera aki un gran cantidad di persona a adkiri residencia.

Durante e tratamento den Corte a repasa mas cu binti caso den cual e supuesto parehanan di matrimonio a declara di a paga sumanan enorme na e sospechoso pa e actanan falso. Den algun di e casonan aki a hasta, riba indicacion di e sospechoso, pone potretnan di casamento den escena of regla un partner di matrimonio Arubiano, tambe contra pago.

Banda di e investigacion penal cu Recherche a haci, Censo tambe a haci investigacion di situacionnan comparabel den cual e sospechoso en cuestion ta parce di ta envolvi. Ta ser premira cu ainda lo bay descubri varios decena di matrimonio ficticio.

E consecuencianan pa Pais Aruba ta grandi, considerando cu residencia di tur e personanan envolvi a wordo adkiri na manera ilegal. Esey ta haci cu e divorcionan cu a bin despues, e residencianan concedi, e muchanan reconoci den matrimonio, etcetera, ningun no tin validez y lo mester wordo cancela. Tambe den e casonan cu no a wordo inclui den e caso penal cu a sirbi awe y cu ta wordo investiga pa Censo, algun di nan bayendo bek te algun decada pasa. Banda di esaki e personanan a haci uso indebido di e sistema social di Pais Aruba, manera beneficionan (pensionnan) y premienan (AZV).

E sospechoso a alabes debilita e maneho di stranheria di Pais Aruba cu su actonan.

El a tambe gana sumanan di placa grandi cu e actanan di matrimonio falsifica. For di investigacion financiero ta resulta cu e no por duna splicacion pa casi 300.000 na gastonan. Fiscal di husticia a exigi recuperacion di e suma aki (ontneming) y a pidi un castigo di prizon di cinco aña contra e sospecho, kende ta nenga di duna apertura.

Clientenan di e actanan falsifica di matrimonio, esta e personanan cu a cera un matrimonio ficticio, lo wordo persigui mas despues. Manera ya menciona, e resultadonan di e investigacion di Censo y di Recherche lo mester tin consecuencia tambe pa nan residencia legal na Aruba.