Director di Saba, Remo Kock hunto cu dokter consehero di DVG, Maritza Ordoñez, ayera tardi a ofrece un splicacion den un conferencia di prensa pa duna di conoce con nan ta trahando cu e casnan di cuido di hende grandi, asina tambe e grupo di nan cu ta biba nan so den momentonan aki cu pandemia COVID-19.

Remo Kock, director di Saba a expresa cu desde 13 di maart nan ta cera e tres cas di cuido cu nan tin, ademas di ta yudando DVG cu e otro casnan chikito. Tambe el a señala cu no tin niun hende cu ta drenta Saba na ningun momento cu no mester. Di esaki, el a bisa cu unico hende cu ta drenta ta esunnan cu ta hiba carga y trahadonan cu ta traha den e tres warda.

Asina mes, Kock a sigura cu te na e momentonan aki no ti un niun hende malo den Saba y den niun di e otro casnan. Si algun persona tin algun pregunta por tuma contacto via telefon cu e manager di algun di e casnan pa haya e informacion corecto, ta importante pa bisa cu no mester bay e casnan di cuido pa haci bishita.

Tambe Kock a expresa cu ora un persona fayece, na e momento ey su famia por bay bishita, pero nan ta bou siguridad.

Kock a informa cu nan no ta acepta niun pakete mas pa drenta Saba y esey ta un medida hopi estricto cu nan a tuma.

Di su parti, Maritza Ordoñez, medico consehero di DVG a ofrece un actualisacion di e tres grupo cu nan ta monitor cu ta casnan di cuido priva. Asina tambe e grupo di hende grandi cu ta biba cerca famia y grupo di hende grandi cu ta biba su so.

Di grupo di casnan di cuido priva, Ordoñez a bisa cu Departamento di Ouderenzorg hunto cu Saba y Inspectie Volksgezonheid Aruba ta den contacto cu tur cas di cuido. Tambe a implementa un protocol cu a sali den tres diferente idioma como Spaño, Hulandes y Ingles cu ta regarda tur medida di higiena di e casnan di cuido, como tambe na momento cu un persona por presenta algun sintoma similar of di coronavirus mes.

Ordoñez a remarca cu ora un persona di edad avansa ta bira malo cu coronavirus ta un caso diferente cu ora esaki presenta cu un persona mas hoben. Pa e motibo aki, el a expresa cu e protocol ta para kico por haci na momento cu presenta sintomanan.

Tambe Ordoñez e comenta cu mayoria di casnan di cuido a cuminsa tuma medidanan prome cu a anuncia e prome caso di COVID-19 na Aruba, esta cu ta no acepta bishita mas y e mayoria di persona cu ta traha aden ta biba eynan, kiermen cu un solo persona ta sali pa haci encomienda, busca remedi of cuminda. Pa e motibo ey el a sigura cu eynan e risico pa un virus drenta den cas di cuido ta minimo.

El a trece dilanti cu tambe e cas di cuido a pone den disposicion pa e hende grandi un telefon pa nan mes por yama nan famia y asina nan no lo bira depresivo den e momentonan aki.

Ordoñez a informa cu tambe tin un grupo grandi di hende mayor cu ta biba su so y di esaki el a bisa cu nan tin hende cu ta yuda nan via Club Kibrahacha. Tin un linea di telefon gratis pa nan por haya contacto cu otro hende, ya cu e mayoria di nan no por sali for di cas y asina nan por socialisa.