4aug, NW, lennie geervliet (1).JPG

Departamento di Salud Publico (DESPA) tin un seccion nobo crea como parti di e maneho di Minister di Salud Publico, Cuido di Nos Grandinan y Deporte, cu ta concentra riba e bienestar general di e ciudadanonan cu a yega edad di pensioen. Minister dr. Alex Schwengle a presenta tambe un ley cu a wordo aproba pa Parlamento y a drenta na vigor dia 1 di augustus.

 

E ley a wordo traha como un asina yama “Kaderwet”, un ordenansa nacional, y ta inclui puntonan clave tambe pa cu cuido di nos grandinan den casnan di cuido; e ley ta defini e “frame”, y e contenido den detaye ta wordo determina y defini pa e “stakeholdernan” den e ramo aki. E ley ta inclui tur cas pa cuido di personanan adulto (18+), pero ta enfoca principalmente riba e bienestar di personanan 60+ bibando den casnan di cuido.

 

Lennie Geervliet, kende ta traha den e “Seccion Cuido di Nos Grandinan” na DESPA, ta splica cu den e proceso pa yega na cierto palabracionnan, a bishita tur e casnan di cuido rond Aruba. Despues di e bishitanan a invita tur doño y director di e casnan pa un reunion cu e hurista di DESPA pa un merdia di informacion pa splica tur loke e ley nobo ta encera. Awo cu e ley a bay na vigor lo sigui mas merdianan di informacion y intercambio pa asina traha riba e diferente puntonan inclui den e ley.

 

DESPA ta disponibel pa brinda guia y yuda tur e casnan den nan cumplimento cu e ley. Lo tin diferente sesion pa papia y discuti varios topico esencial, lo sigui cu e proceso di defini e contenido di e ley y lo tin oportunidadnan pa ricibi guia individualmente na cada cas. For di tur e casnan di cuido nan a haya e mesun peticion. Ta pidi acesoramento,  esta yudansa pa por ofrece mas actividadnan/recreacion den dia pa e habitantenan.

 

Geervliet a splica cu tin sugerencia pa provee servicio di un of dos begeleiders di actividad cu por tuma turno trahando na e diferente casnan pa curasha mas recreacion y actividadnan creativo. Esaki ta algo cu e casnan a pidi pe y e ta un necesidad. Asina uniendo forsa ta logra yega na un formula pa por brinda e habitantenan e recreacion y actividadnan cu falta. El a bisa cu otro puntonan principal di e cuido di hende grandi cu mester di atencion ta entre otro privacidad, siguridad y acercamento adecua segun e condicion fisico y mental di cada habitante.

 

Pa loke ta trata privacidad den e casnan di cuido tin algun reto como cu mayoria di e casnan aki a wordo construi originalmente como casnan di famia y ora a cambia nan destinacion no tur ta ofrece e situacion ideal pa un cas di cuido den sentido di provee e privacidad adecua. Siguridad ta un punto cu por ehempel lo ricibi asistencia for di brandweer  unda cu ta necesario. E factor acercamento ta unda cu sigur cierto tipo di training riba condicionnan manera Alzheimer’s y Demencia lo yuda hopi, como cu tin hopi persona cu e condicion mental aki na Aruba y e grupo ta sigui crece.

 

Ofreciendo cursonan special riba condicionnan specifico ta yuda e personal di e casnan tambe con pa acerca e habitantenan  cu diferente necesidad y condicionnan na e forma cu ta mas comodo pa nan y ta crea miho oportunidadnan pa bon comunicacion.

Lenny Geetvliet a conclui bisando cu e calidad principal cu nan a topa cu ne na tur cas, cual ta un factor masha importante, ta cu por a wak cu e personal y e maneho di e casnan ta haci nan trabao cu curason y motivacion pa duna bon cuido, y nan ta ricibi e ley cu un actitud di positivismo.