Manera ta conoci, CasMarie ta un centro di encuentro specialisa den e guia y trato di persona cu demencia y nan a keda invita pa VU University Medical Center (VUmc) Amsterdam, Hulanda, pa ta un orador invita na e conferencia BestCare4Dem ‘Sharing effective community-based support in dementia’.

Esaki a tuma luga na Amsterdam na unda mas cu 280 participante di 13 pais a atende e conferencia aki, na unda algo mas cu 40 orador a duna un presentacion, di cual CasMarie tabata uno y cu a inspira e participantenan, segun e comunicado ricibi di CasMarie.

Impresionante tabata e arte traha pa personanan cu demencia cu a wordoexponi na e conferencia. Pa CasMarie e tabata un gran honor pa por ta presente na e congreso aki y comparti cu e publico su experencia den cuido y guia di persona cu demencia na Aruba.

CasMarie a wordo representa pa su presidente, Yvonne Escalona y e fundado Boy Escalona. Ademas cu a ricibi hopi inspiracion nobo. Cas Marie a zorg pa impacta na momento cu a presenta cu hopi orguyo e proyectonan di CasMarie y su desaroyo den e ultimo 10 aña.

CasMarie ta un pasadia specialisa pa persona cu demencia y nan famia. Pa ta mas cerca di nos clientenan, CasMarie a cuminsa cu e proyecto ‘CasMarie den bo Bario’ durante mainta na Centro di Bario Tanki Leendert y na playa den e Centro QuiVit. Ademas di e guia na e persona cu demencia nos ta duna informacion y guia na cuidadonan informal.

CasMarie ta consciente di e importancia pa informa pueblo di Aruba tocante demencia y pa logra esaki ta entre otro organisa 4 bes pa aña, ‘Dementie Cafe CasMarie’, na unda diferente tema y informacion en general ta wordo comparti. Tur persona ta bon bini pa atende e anochinan aki di ‘Dementie Café CasMarie’. Pa ricibi mas informacion por

bishita tambe e pagina di facebook CasMarie Centro di encuentro pa persona cu Demencia y nan famia.

CasMarie di berdad ta un proyecto unico na Aruba unda nan ta traha cu hopi amor y dedicacion. Pa mas informacion por contact nan na 584-3375 of 569-6910. Tambe por contact nan via facebook, CasMarie Centro di encuentro pa persona cu demencia y nan famia, e comunicado ta finalisa bisando.