En bes cu casinonan ta cuminsa prepara pa cumpli cu ley cu ta prohibi huma, nan ta ‘hunga sabi’. Nan ta dedica entre otro cu un area den casino unda no por huma. Esaki Marlon Sneek, lider di fraccion di AVP, ta critica.

E ley mes, esta ‘Landsverordening beperking tabaksproducten’ a keda aproba. Sinembargo e formalidadnan administrativo ainda mester keda finalisa pa asina e ley aki por drenta na vigor. Segun sr. Sneek cu tambe tabata e legislado cu a pasa e ley aki e ley mes ta hinca den otro pa e ley drenta na vigor paso pa paso.

E ta remarca cu ta parce cu algun casino no a compronde e ley anto a cuminsa haci algun ahustacion robes. Casinonan tin mas o menos 6 pa 8 luna mas di tempo prome cu e ley aki cuminsa conta pa nan segun informacion sr. Sneek ta splica. Aworaki ta entre otro departamentonan di gobierno, luganan deportivo y algun otro negoshinan cu tin e ley aki na vigor. “Ami ta wak manera cu e casinonan a cuminsa hunga sabi. Manera e casino na Hyatt por ehempel a pone cu nan ta e unico casino cu tin un smoking free room. Mi mes no a bay wak e ainda pero si ta asina, esaki mester ta lo contrario: cu e casino ta completamente liber di huma anto cu bo tin un luga separa cu ta cera pa huma.”

E politico ta enfatisa cu si mester crea un parti of zona separa pa huma esaki mester ta cera pa e no contamina of molestia e resto di esunnan den casino. Anto e no mester ta den e casino mes.

Comentario di Hyatt
Bon Dia Aruba a bishita e casino na Hyatt hotel pa un reaccion riba esaki. Manager Junior Maduro ta bisa cu locual nan tin actualmente ta “e inicio pa e fase di preparacion.” Segun sr. Maduro, casinonan tin eigenlijk te cu 2 aña pa prepara pa e ley nobo aki. Actualmente e casino aki tin un area cera cu ta den e casino mes pero cual ta pa esunnan cu no ta huma. “Pa ora cu nos ta cla pa introduci e ley completamente pues nos ta haci e cambio cu no ta bay por permiti pa huma den e casino pero solamente den e area cera designa pa esey. Aworaki e tabata hopi pisa pa nos por yega introduci e ley aki cu riesgo di perde cliente. Esaki pues ta e prome paso pa cuminsa custumbra e clientenan.”

Bon Dia Aruba a tuma contacto cu Departamento di Asuntonan di Casino kende no por a duna nos ningun otro informacion riba e desaroyo y preparacion di e ley aki na casinonan na Aruba. Nan a referi nos pa tuma contacto cu Asociacion di Casinonan di Aruba pa wak con exactamente e casinonan ta preparando pa esaki. Bon Dia Aruba lo tuma contacto cu nan pa trece mas informacion riba esaki.

Control ta bao Departamento di Salud
En principio den e parti di control segun sr. Sneek, e ‘Algemene Politie Verordening’ ta cual ta duna Cuerpo Policial e autoridad pa controla tur cos. Departamento di Salud Publico – kende tambe ta duna permiso – pues tambe ta encarga cu e parti di control. E departamento aki awo mester nombra hende cu lo haci e control aki pa nan. E ley aki ta riba un linea cu e mision di e departamento cu ta pa stimula salud, evita pa tin malesa y zorg pa tin e condicionnan basico necesario pa crea un ambiente caminda henter e comunidad di Aruba por biba un bida saludabel. Productonan di tabaco ta causa un daño enorme na e salud publico cu ta genera gastonan halto den e sector di cuido. Esaki ta cay den e categoria di “vermijdbare doodsoorzaak” of un causa di morto cu por a wordo evita. P’esey e ley aki ta purba di proteha e grupo di no humadonan y tambe descurasha e humadonan, segun e instancia. E ley aki ta stipula cu e dunado di trabao tin e obligacion pa percura pa tuma medidanan necesario pa su trahadonan por haci nan trabao sin haya daño relaciona cu e uzo di productonan di tabaco door di otro personanan.

Sancionnan
E ley tambe ta stipula cu e exploitantenan di transporte publico, manera busnan, taxinan, tours etc., tin e obligacion di tuma medidanan necesario pa e clientenan cu ta wordo transporta por haci uzo di e transporte sin e wordo exponi na efectonan dañino di uzo di productonan di tabaco. E ley aki tambe ta prohibi pa bende of distribui productonan cu ta contene tabaco den edificionan di gobierno, instancianan di cuido, di cultura, deporte, educacion etc. cu ta cay bao di cierto categorianan prescribi den e ley.

Tambe ta trece e prohibicion di bende productonan cu ta contene tabaco na personanan menor di 18 aña. Den luganan caminda e productonan aki ta wordo bendi, mester tin un borchi visibel pa tur hende caminda ta para cu no ta bende e productonan aki na personanan bao di 18 aña di edad. Segun inspectie di salud: “Nos por mira cu e ley aki ta trece un serie di medidanan pa proteha e personanan cu  no ta huma di e efectonan negativo di productonan di tabaco. E ley aki por wordo enforsa door di un serie di sancionnan cu ta prescribi den e mesun ley. E ley ta stipula cu minister di Salud Publico, Cuido di Ancianonan y Deporte por kita e permiso pa bende productonan di tabaco, ora cu constata cu e ley aki a wordo viola. Tambe por bay over na duna un boet. P’esey Departamento di Salud Publico ta informa pueblo di Aruba y ta pidi tur esunnan concerni pa tuma bon nota di e cambionan cu e ley aki lo trece cu ne.”