Mediador di Gobierno, sr. Anselmo Pontilius ta considera cu pa loke ta e clima laboral, durante 2015 tabatin basta trabou den mundo di construccion locual e ta haya cu esaki ta un contribucion grandi den cualkier economia. Pa loke ta 2016, e pregunta ta si lo bay tin mesun hopi proyectonan cu ta duna actividad laboral. Sinembargo unda si ta existi un incertidumbre laboral ta e mundo di casino, y esey nos por a observa durante 2015, segun sr. Pontilius.
Casino
Sr. Pontilius a declara na Bon Dia Aruba cu den e sector aki ta existi un preocupacion den sentido cu algun casinonan no ta na nivel di cu nan a spera di ta. “Esaki ta un sector cu tin cu evalua seriamente den 2016”, el a bisa.
Siman pasa a presenta algun problema cu e trahadonan di Aura Casino cu a exigi e pago di nan bonus segun nan acuerdo di CAO, pero gerencia no por paga awor. Pues –segun Mediador di Gobierno- e ta un sector cu mester monitor hopi di cerca riba con ta atende cu ne.
Sr. Pontilius a bisa cu actualmente den mundo di casino ta existi varios factor cu ta hunga un rol importante. Un di nan ta e cantidad di persona cu lo ta disponibel pa gamble of gasta den casino. Pero tambe e costo di un operacion di un casino. Logicamente e costo di un operacion di casino ta inclui e costo di su personal cu ta algo costoso, y cu den un caso asina tambe ta normal. Pero tambe otro costo nan cu ta draai rond di nan.
Igualmente ta existi un diferencia entre e casino cu ta pertenece na un cadena hotelero cu ta opera su mesun casino; y tin e casinonan cu tin un operador cu ta paga entre otro un suma di huur pa opera e casino den hotel. E maneho entre un y otro tambe ta diferente.
Construccion, un sector dinamico
Construccion ta un sector “dinamico” di nos sector laboral, asina Mediador di Gobierno, sr. Anselmo Pontilius a declara na Bon Dia Aruba den su analisis riba e clima laboral durante 2015.
E aña aki tabatin negociacion cu un parti di e companianan mas importante di construccion cu ta agrupa bou un asociacion y cu a tene reunion cu sindicato STA. Y a pesar cu tabatin algun turbulencia y paro di trabou, nan a yega na un entendimento cu otro.
Refineria
E posibilidad di un reapertura di e refineria tampoco a scapa fei di Mediador di Gobierno su percepsion riba e clima laboral. El a menciona cu refineria eventualmente lo crea mas actividad laboral riba nos isla. Ya nos a cuminsa mira cu algun companianan di construccion cu a papia cu e minister concerni pa tene cuenta cu nos mercado laboral local, y evita cu lo trece hendenan di afo.
Sr. Pontilius a indica cu DPL y Departamento di Labor actualmente ta realisando un sondeo laboral pa wak ki porcentahe di hende ta sin trabou y cuanto cupo di trabou tin habri. A pesar di e tasa di desempleo cu Gobierno ta maneha di un 7.5%, el a bisa cu durante e ultimo lunanan nos por mira anuncio di companianan buscando hende pa traha. Un echo ta cu nos a yega na e temporada halto di aworaki pa april y mei y lo tin compania cu lo mester extra trahado na trabou.
