For di e datonan mas recien di Departamento di Impuesto (DIMP) a sali afo cu 22 porciento di automobilista no a paga completamente nan impuesto. Di e grupo aki, diestres porciento no a paga absolutamente nada e aña aki.
E informacion aki a keda comparti pa portal online, Aruba.nu.
E cifras ta nifica cu tin casi 12mil auto cu ainda no a haci ningun pago di impuesto pa e aña aki.
Meverly Romano, vocero di DIMP, a destaca cu automobilistanan mester cumpli cu pago completo di belasting, mas ainda awo cu luna di juli ta cabando.
“Ya bo no por paga solamente un parti di e aña. DI e casi 91mil auto registra, tiki mas cu 77mil a paga nan impuesto completo. Pues 22 porciento no a haci’e, y e otro 1 porciento a entrega nan plach’i number back pasobra nan auto no ta den uso,” segun Romano.
Pa esnan cu ainda no a paga nan impuesto, tin gastonan adicional awo mara na esaki. Romano a splica cu “si bo mester a paga 150 florin di belasting y bo no a haci esey, e ora awo bo mester paga 225 florin pa motibo di un multa di 50 porciento riba e suma original. Nos kier evita esaki pa tur hende, pa e motibo aki nos ta recorda hende constantemente pa paga na tempo.”
