9despa (1).JPG

Den fin di siman un biaha mas DESPA hunto cu polis a controla tur bendedo riba e ruta di carnaval. Hopi di e bendedonan tabata cumpli cu tur e rekisitonan pa por traha riba e ruta, segun observacion di departamento Sr. Patrick Lacle.

Pa e ruta di San Nicolas Sr. Lacle no por a duna informacion pa motibo cu su ploeg no a controla pariba, pero un otro ploeg tabata encarga pa controla riba e ruta di San Nicolas. El a bisa Bon Dia Aruba cu durante henter e parada mayoria di e bendedonan a cumpli cu e rekisitonan. Polis tabata traha hunto cu nan pasobra, nan tabata encarga pa controla tur e permisonan pa bende, mientras cu DESPA tabata controla e parti di higiena pero tambe con e cuminda ta wordo warda.

Durante e control, DESPA tabata midi e temperatura con cayente e cumindanan mester ta. Segun Sr. Lacle na Bon Dia Aruba, manera sopi of otro cuminda cayente mester ta na un temperatura di 60 y otro cuminda friu mester wordo warda na un temperatura preferibel di 7 grado bay abou. Esunnan cu no tabata tin nan cuminda na e temperatura adecua, e trahadonan di DESPA lo purba di yuda e bendedonan pa tin esaki na e temperatura corecto. “Pasobra corda si bo warda cuminda y esaki no ta friu, e ta daña lihe riba bo. Y riba un parada grandi asina aki, bo ta haci hopi hende malo,” el a comenta. “Y cuminda cayente manera sopi, mester ta na 60 grado bay ariba. Esaki ta pa preveni cu bacteria por crece bek. Di 60 pa 20 grado, bo ta wanta e bacteria asina mes abou. Pero asina cu ta 20 grado bay abou, e bacteria ta bira hopi activo,” el a bisa Bon Dia Aruba.

A puntra Sr. Lacle si prome cu carnaval si tanto polis como DESPA ta reuni cu e bendedonan pa asina recorda nan riba e parti di higiena of si ta durante parada so nan ta conscientisa bendedonan un biaha mas. El a indica, prome cu e bendedonan haya nan permiso, un formulario ta wordo manda na e bendedonan cu tur instruccion riba dje, unda cu ta recorda nan riba e temperatura, con pa warda tur cuminda y cu mester laba man cada biaha. Tambe tabata recorda nan pa tin habon pa laba man, cosnan di seca man y tur loke cu mester pa mantene e luga limpi.

Durante parada nunca por comproba si en berdad un persona a bira malo pa motibo di e cuminda cu ta wordo bendi, segun Sr. Lacle. Esaki ta bin pasobra tin biaha hende por a come na su cas tambe, of e por a come fout. Hopi biaha hende ta kere cu ta e ultimo cuminda cu nan a come a haci nan malo. Mester prueba cu e cuminda a haci e persona malo riba caya y asina ey por bisa cu e bendedo ta castigabel. Pizza Hut ta bende pizza durante e ruta, pero segun Sr. Lacle nan ta percura pa na tanto meter leu tin un auto cu otro pizza pa cambia. Esaki no ta solamente pa si pizza caba sino pa tambe si mester cambia e pizza.