E number di hogarnan cu entrada abou na Hulanda a mantene sin cambio te cu fin di aña 2018, pero por a conoce un disminucion e aña aki. Esaki ta segun e agencia nacional di estadistica CBS. CBS a establece e entradanan abou na €12,750 di aña pasa pa un persona soltero y €2,000 pa un famia. Na 2018, 584,000 hogar tabatin entrada bou di e linea di pobresa of e 7.9% en total, CBS a bisa.
E cifranan aki a mantene nan mes sin cambia desde 2016, a pesar di e crecemento economico fuerte registra den e ultimo añanan, CBS a bisa. Sinembargo segun e estimacionnan nobo di e grupo di expertonan macro economico di gobierno CPA, e porcentahe lo baha pa 7.4% e aña aki y 6.6% na 2020. E number di muchanan cu ta biba bou di e nivel abou di entrada tambe a mantene sin cambio aña pasa, pero tabata tin caida chikito den e number di muchanan cu ta bida den pobresa durante al menos cuater aña.
Mita di e famianan cu ta biba bou e linea di pobresa a bisa cu no por permiti un siman di vakantie tur aña. Hogarnan forma pa personanan cu antecedente di minoria etnica particularmente e refugiadonan di Siria y Etiopia ta core e riesgo di biba bou un linea di pobresa, igual cu e famianan cu un solo mayor. Rotterdam tin un porcentahe grandi di mucha cu ta biba den hogarnan pober, dobel di promedio nacional, sigui pa Heerlen, Amsterdam, Den Haag y Delfzijl den e provincia di Groningen.
