Fin di siman ultimo, Cuerpo Policial di Aruba tabata man yen debi na Jouve Morning y Lighting Parade, unda controlnan y listramento a tuma luga, loke a duna como resultado 68 persona deteni pa diferente motibo, manera posesion di droga, buracheria, bringamento, core auto bao influencia, entre otro.

21 detencion pa Jouvert Morning

Mediante informacion obteni door di Cuerpo Policial, a bira conoci cu diasabra ultimo pa 3or di mainta SMAC conhuntamente cu KPA a duna inicio na Jouvert Morning 2024.

KPA a conta cu 138 personal riba pia unda diferente departamento di Cuerpo Policial a traha hunto, entre otro, Mobiele Eenheid, Flex Team, Polis Uniforma, Departamento di Recherche, Personal administrativo, departamento di trafico y planologie, AE, K9 Unit, Mobiel Commando y como tambe personal di CEA.

Pa 7:44 mainta e cabes di e parada a yega Joe Laveist y pa 8:14 parada a yega su final.

E aña aki tabatin 21 detencion di cual 6 a bay pa departamento di recherche.

E detencionnan tabata basa riba droga, arma blanco, bringamento, buracheria y no sigui ordo di polis. Aña 2023 tabata tin 19 detencion.

14 chauffeur deteni despues di Jouvert Morning

Durante y despues di Jouvert Morning, unidad motorisa a tene nan control di trafico na diferente puntonan strategico rond nos isla, na unda a controla mas cu 200 vehiculo di motor y a detene 14 chauffeur pa maneha bao di influencia di alcohol.

Durante e control aki, 12 chauffeur a perde nan rijbewijs “ingevorderd” y nan lo mester presenta dilanti hues pa trata nan caso. Dos di nan no tabata tin rijbewijs mes. Aña 2023 tabatin 24 detencion.

Lighting Parade cu 18 detencion

Diasabra anochi pa 7:59, Cuerpo Policial conhuntamente cu SMAC a haci inicio di e Lighting Parade, unda e anochi aki tabata tin un total di 9 grupo y 4.201 participante.

Cuerpo Policial a conta cu 201 personal, entre otro Polis Uniforma, ME, AE, departamento di recherche, Motor Unit, K-9, departamento di trafico,, Mobile Commando, departamento di planologie, personal administrativo y como tambe personal di CEA.

Pa 0057 e cabes a yega ex-DOW y pa 03:15 di diadomingo madruga e parada a yega final.

E aña aki nan a conta cu 18 detencion, pa motibo di posesion di droga, arma blanco , bringamento, no sigui ordo di polis, buracheria. Aña 2023 tabata tin 12 detencion.

Unidad motorisa cu 15 detencion

Unidad Motorisa despues di Lighting Parade a tene control pa cu maneho bao influencia di alcohol. Nan a informa cu mas cu 150 auto a ser controla y un total di 15 persona a keda deteni pa maneha auto bao influencia di alcohol, e resultado ta cu 13 chauffeur a perde nan rijbewijs “ingevorderd”.

Nan a sigura cu controlnan di unidad motorisa lo continua durante y despues di cada evento di carnaval.