Casi 70.000 firma pro igualdad Homosexual

Awe e reunion riba e cambionan den Codigo Civil ta sigui, un debate cu ta atrae hopi atencion pa motibo di e amienda di parlamentario Desiree De Sousa Croes riba partnernan registra di mesun sexo. Awor cu gobierno tin e intencion pa nan mes bin cu cambio pa sigura igualdad, e ta bisa cu no lo vota mas riba e amienda separa.

Pues awe mester bin claridad si minister di Husticia, cu tambe a pidi mas tempo ultimo biaha pa sondea riba e asunto di partner registra, y specialmente di mesun sexo, lo bin cu un cambio di nota. Y cu e cambio di nota aki realmente lo encera locual parlamentario De Sousa Croes tambe kier realisa cu su amienda.

 ”Mi ta contento cu hopi parlamentario a realisa cu tin un desigualdad entre personanan den nos comunidad y cu esaki mester cambia. Tambe, mi ta contento cu Minister di Husticia kier hinca tempo y energia pa haci e cambionan necesario pa sigura igualdad’”, Sra. Croes ta bisa Bon Dia.

Sra. Croes ta comenta cu si gobierno mester bini cu un nota di cambio, pues no lo vota riba e amienda separa, pero lo vota na final riba e ley completo incluyendo e introduccion di Union Civil.  “Pero mi no sa si esaki ta bay pasa, tanten cu esaki no ta e caso, e amienda lo keda vigente.” 

Sra. Croes ta bisa enfatisando cu si e nota no bin of no trece cambionan cu nan ta desea di wak e amienda ta keda riba mesa. E tema aki ta uno cu seguramente a wordo discuti den pasado entre otro den un caso cu a wordo bringa te na Corte Europeo, di e pareha homosexual casa esta Oduber y Lammers,  cu a bringa hopi aña pa nan derechonan. Awor De Sousa Croes ta bringando pa partner registra di mesun sexo tambe tin mesun derecho cu partner registra. Den e caso cu gobierno lo bin cu su nota di cambio y parlamento tampoco ta aproba e amienda pa un cambio, e ora e parlamentario ya a indica cu lo tambe bay corta pa bringa e caso.

Pa motibo cu tin hurisprudencia di e caso di Oduber y Lamers pero tambe otro casonan, e chens ta mas grandi cu lo gana e caso di partner registra dilanti hues. Siguramente cu recien tambe Corte di Europeo a haci varios veredicto riba casonan similar. Un otro punto interesante ta cu e studiante Arubano Amy Yrausquin Roos ya a caba su master riba e tema di matrimonio homosexual  y segun su investigacion e desigualdad di matrimonio homosexual (na Aruba no por casa pero si por registra e matrimonio) no ta algo cu por keda existi pa motibo cu ta discriminatorio. Y cu ta interesante pa bin cu un caso pa forsa Corte Europeo yega na un veredicto den cuadro tambe di derechonan humano Europeo, regla den e tratamento EHRM.

Bek den tempo: Caso Oduber & Lamers

Charlene Oduber, hunto cu e tempo ey su casa Lammers, a bringa añanan pa por inscribi nan matrimonio den e registro di Aruba. Corte den prome instancia ya a duna nan rason, pero gobierno a keda bringa te na Hoge Raad. Sinembargo gobierno a perde e casonan y tabata obliga pa inscribi e matrimonio. Despues e veredictonan gobierno a keda nenga di inscribi nan y finalmente na 2007 cu hopi presion tambe fei Hulanda, e prome pareha homosexual (no Oduber cu Lamers finalmente) por a inscribi nan mes na e registro Arubano.

Oduber ta bisa awor cu ta mas cu 16 aña e ta bringa pa emancipacion di homosexual na Aruba sinembargo ‘huridicamente no a yega mucho’. Lesadonan por haya su opinion completo riba pagina 11 den e edicion aki.

Casi 70.000 firma pa sostene igualdad na Aruba
E campaña internacional cu a sali for di organisacion True Colors di Aruba a yega na 49.399 firma di diferente miembronan rond mundo pa locual e mayoria di nan a bin for di Merca y Europa.  “Hopi positivo, nan no a haci e hopi grandi mirando cu nan tin miyones di miembro anto nan no kier duna Aruba un mal nomber turisticamente pues a haci e bao di un grupo un tiki mas chikito di nan miembronan pa duna atencion na e asunto”, parlamentario De Sousa Croes ta bisa.

Igualdad Aruba ta un otro campaña pero uno nacional cu a yega alrededor di 18.000 firma di cual menos cu e mita ta aworaki ta confirma te ainda di ta Rubianonan registra na Aruba cu por vota. Pero ainda ta den proceso controlando esaki.  Mas cu 70% ta hobennan bao di 30 aña.