Confiansa di e consumidor a deteriora den e di prome trimester di 2016 despues di un mehoracion leve den e di cuatro trimester di 2015. Entre otro 58,9% di persona entrevista a indica cu expectativanan pa haya un trabou den futuro lo ta mas dificil
E Indice di Confiansa di Consumidor a cera na 94,5 pa e prome trimester di 2016, cual ta un bahada di 1,0 punto di indice compara cu e di cuatro trimester di 2015 (mira grafico). E Indice di Situacion Actual a baha di 94,7 te na 93,2 mientras e Indice di Expectativanan a cay di 98,0 te na 95,1.
Evaluacion di e consumidornan pa cu condicionnan actual tabata mas scur cu e di cuatro trimester di 2015. Un porcentahe mas grandi di respondientenan (di 24.2 porciento pa 33.7 porciento) a indica cu condicionnan financiero personal a bira “peor” cu seis luna pasa.
Ademas, 49,4 porciento a indica cu condicionnan di negoshi a bira peor, un resultado similar na e trimester anterior. Tambe e porcion di consumidornan, indicando cu e posicion financiero di gobierno a deteriora, a subi cu 3,9 punto di porcentahe te na 54,9 porciento. Notabel ta cu solamente 3,8 porciento di respondientenan a indica cu e expectativanan actual pa empleo a mehora (menos cu e 6,0 porciento den e trimester anterior).
Consumidornan tabata mas pesimista riba e futuro cercano den e prome trimester di 2016. E grupo di consumidornan cu ta spera cu nan condicionnan financiero personal lo mehora a cay di 32,6 porciento te na 20,1 porciento. E sentimento aki tambe tabata evidente den respectivamente, condicionnan di negoshi pa futuro (di 24,5 porciento te na 17,3 porciento) y dene posicion financiero di gobierno pa futuro (di 22,1 porciento te na 12,5 porciento).
E percepcion di condicionnan laboral di consumidornan pa futuro tambe tabata menos faborabel, pa motibo cu 58,9 porciento di e respondientenan a indica cu expectativanan pa haya un trabou den futuro lo ta mas dificil(subiendo di 46,4 porciento).
E indicenan di expectativa di prijs y custumber di compra di consumidor a mehora marginalmente. E Indice di Expectativanan di Prijs a aumenta di 90,5 den di cuatro trimester di 2015 te na 90,7 den e trimester bou reviso. E porcion di consumidornan indicando cu prijsnan tabata mas abou cu seis luna pasa a subi di 2,1 porciento te na 2,8 porciento.
Finalmente, e Indice di Habito di Consumo a mehora un poco di 95,1 te na 96,0. Sinembargo, mayoria di consumidornan tabata kere cu ainda no tabata apropia pa cumpra un auto (56,4 porciento), aparato grandi (50,4 porciento), haci un prestamo (63,4 porciento) of un hipoteca (70,9 porciento). E desaroyonan den habitonan di consumo a mitiga e bahadanan den e otro componentenan di confiansa di consumidor.
Resumiendo, e caida den confiansa di consumidor ta atribui, pa gran parti, na un subida den e pesimismo di consumidornan pa cu condicionnan actual y nan futuro cercano, parcialmente mitiga pa un mehoracion den nan percepcion riba nan habito di consumo.
