E carta cu director di Departamento di Financia a manda pa e Informador dia 3 di october, pa informa su persona en corto tocante e estado financiero di gobierno di Aruba, a yega na nos man y ta aparece riba e mesun pagina aki.
For di su contenido por conclui cu e departamento ta mira cu pa otro aña lo tin un deficit di Afl. 195 miyon pa financia, si no ta bay tin cambio di maneho cu ta influencia posibel entrada o gasto. Na prome luga ta señala, cu segun e schema imponi pa ley di CAft, mester bay di un deficit di Afl. 25 miyon e aña aki, pa un surplus di mesun suma pa 2018, un diferencia di 50 miyon por lo tanto. Tambe ta señala dos item di entrada grandi cu ta di un biaha so, cu ta e resto di e suma di settlement agreement cu Valero, di Afl. 27 miyon, y e benta programa pa e aña aki di e compania FMSA, cu ta distribui combustible na Aruba, pa Afl. 40 miyon. Recientemente gobierno a anuncia cu lo no bende e compania mas, pero no a bisa kico ta haci cu e 40 miyon di deficit den presupuesto 2017 cu esaki ta crea.
Fuera di esey un aumento di Afl. 42 miyon den gasto, mayoria ta causa pa e pagonan di proyectonan PPP y contribucion di gobierno na deficit di AZV. Pa loke ta e entrada y gastonan di 2017 e departamento ta expresa nan conviccion cu en general lo cumpli cu loke ta presupuesta, tanto na banda di entrada como di gasto, salvo algun adaptacion menor aki, aya. Esaki lo implica anto cu no tin mester di un presupuesto complementario.
E carta ta bisa tambe cu Banco Central ta recomenda busca financiamento den exterior. Esaki por tin di haci cu e buskeda di ekilibrio den debe local y debe den exterior. E aña aki gobierno a coloca varios prestamo den forma di bono riba mercado local.
