Casi 1400 persona a keda deteni pa polisnan cu a baha masha agresivamente riba un protesta di oposicion, asina un watchdog Ruso a bisa diadomingo, agregando cu e protesta a conta cu e cantidad mas halto di detencion durante un protesta ultimo decada.
OVD-info, cual a monitor arestonan policial desde 2011, a bisa cu e cantidad di detencion durante e protesta diasabra a yega 1,373 pa diadomingo mainta. Mayoria persona a keda libera pero 150 a keda den custodia, asina OVD-info y un organisacion di conseho huridico pa personanan sin recurso a bisa.
Polis a cuminsa actua contra e personanan protestando e gobierno di Putin ya dianan prome cu e rally a tuma luga. Autoridadnan a aresta lider di oposicion Alexei Navalny diaranson pasa y a dicidi di alabes lag’e cera pa 30 dia. Esaki pasobra e lider opositor a haci un yamada pa protesta contra e echo cu autoridadnan di eleccion a nenga participacion den e voto di 8 di september pa conseho municipal di Moscu.
Embahada di Merca na Moscu a lamenta e ‘violencia demasiado excesivo’ di parti di polis, mientras e conseho di derecho humano di e presidencia Ruso a bisa cu nan tabata hopi preocupa pa e echo cu a uza violencia policial pa purba controla e protesta.
