Ceara, estado na noreste di Brasil, ya tin registra 136 morto a causa di Chikungunya te cu dia 11 di november ultimo, di acuerdo cu e datonan di Secretaria di Salud di Estado (Sesa). E capital Fortaleza ta concentra e mayor cantidad di caso, incluyendo 105 morto. E cantidad di caso confirma di e enfermedad a yega te na 99.226 na henter estado, di cual 56.641 na Fortaleza, loke ta representa 58% di e total. Mas di mita (51,2%) di e casonan di Chikungunya registra na Brasil ta na estado Ceará, segun un boletin epidemiologico di Ministerio dis Salud. Na luna di juli tabatin ainda 41.479 caso confirma, loke den menos di cinco luna a bira casi 100.000. Na juli e estado tabata lidera e ranking nacional caba pa incidencia di e enfermedad: 462,7 caso pa cada 100.000 habitante. Brasil tabatin 80.949 caso di Chikungunya y un tasa di incidencia di 39,3 caso/100.000 habitante.
Organisacion Mundial di Salud (OMS) ta considera nivel epidemico ora un ciudad o region tin mas di 300 caso pa cada 100.000 habitante. E ciudad General Sampaio, na norte di Ceará, tin e situacion mas critico, cu 5.054,8 caso pa cada 100.000 habitante, 16,8 biaha e indice epidemico di OMS.
E enfermedad ta provoca keintura, dolor na brasa y pia y por causa un tipo di reumatismo. Di acuerdo cu specialistanan, e sintomanan por inclui ausencia di dolor, dolor modera o dolor grave. Den alrededor di 50% di caso, e sintomanan ta bira cronico.
E tipo nobo di reumatismo aki, cu tin similaridad cu artritis, di cual e causa ta parce di ta e inflamacion di brasa y pia y e infeccion di e nervionan, cu ta duna e sensacion di ta casi na soño. Aparte di esaki, ta presenta tambe hinchamento pasobra e virus ta ataca e sistema linfatico tambe.
