Cascabel ta un di e especienan estrictamente protegi na Aruba y internacionalmente

Siguiendo e articulo publica den nos edicion di ayera tocante e proyecto di monitor Cascabel di Aruba Conservation Foundation (ACF), e articulo di awe ta enfoca riba e Cascabel, proteccion di e especie aki y con comunidad por yuda sigui proteha e colebra aki.

Giancarlo Nunes, Reasearch Conservation Manager na ACF, a splica cu e Cascabel ta un colebra cu ta hopi protegi, tanto na Aruba como internacionalmente. Mescos cu Santanero, no mag di mata Cascabel y segun Nunes a remarca eigenlijk no mag ni di mishi cu un Cascabel pasobra por hasta haya boet, asina estricto nan ta proteha na Aruba.

El a enfatisa cu na momento cu un persona mira un Cascabel, prome cos cu mester haci ta yama Aruba Conservation Foundation. E rangers di ACF a train cu expertonan di afo tocante con pa maneha un Cascabel y con pa move nan di un manera sigur pasobra si djis coy un Cascabel y hib’e un caminda e por muri. E rangernan tin training specifico den con pa move y pone un caminda pa e ta sigur.

El a splica cu ta hopi importante pa un Cascabel na momento di move, pa no move mas cu 500 meter leu for di unda el a ser haya, pasobra si no e chance cu e por muri ta grandi y tin diferente motibo pa esaki.

Nunes a sigui splica cu si move mas di 500 meter leu for di unda a hay’e inicialmente e Cascabel no ta bay conoce e luga bon, e no sa unda pa gara cuminda, no sa unda pa sconde,no sa si tin cacho, si tin burico of cabrito cu por trap’e of no sa si tin cunukero cu por mat’e.

E Cacabel ta custuma y conoce e luga, e area, cu e tabata biba aden pa motibo cu probablemente e lo tabatin tres of cuater aña caba bibando cerca di e hendenan cu a hay’e pero nunca a ripara y ora nan ripara nan kier move, core cune of hasta mat’e.

El a indica cu loke e rangers ta haci pa move e Cascable ta busca un luga den cercania unda e tin e chance mas grandi pa sobrevivi pa lag’e los eynan. “Nos tin cu haci esey cu hopi cuidou pasobra si haci’e fout e Cascabel por muri. P’esey nos ta pidi hende pa simplemente yama parke y nos ta handle e,” el a resalta.

Ademas, el a agrega, cu tur Cascabel cu hende yama ACF p’e ta bira parti di e proyecto di sondeo, monitoreo y analisis y ta bira parti di e investigacion, dus e ta beneficioso pa tur hende pa tuma contacto cu ACF di biaha ora mira un Cascabel.

Nunes a splica cu Aruba tin cuater tipo di colebra. Un di nan no ta di Aruba, cual ta e Boa, despues tin e Cascabel, e Santanero y e “Blind Snake”, cu ta un colebra hopi chikito cu en realidad parce un bichi, pero no ta un bichi. E especie aki ta biba hopi den hardin of cunucu unda ta muha matanan cu hopi awa.

Santanero ta otro especie di colebra cu ta proteha na Aruba. E no ta peligroso y no ta venenoso pa hende. E ta venenoso pa insecto y pa bestianan chikito, e ta come cacalaca, raton y ta yuda wanta cura di cas limpi di e bestianan chikito aki. Pues no mester tin miedo di e Santanero.

Nunes a splica cu hopi hende ora nan wak un Santanero nan no sa e diferencia entre e Santanero cu un Boa y tin biaha ta mata un Santanero en bes di Boa. El a suplica comunidad si den caso nan no sa e diferencia entre un Boa of un Santanero of no sa kico ta un Santanero, pa no mata e colebra y yama e ACF Hotline.

Na momento cu rangers di ACF determina si ta un Santanero nan ta lag’e, no tin peliger, si ta un Boa ta bay cune y si ta un Cascabel ta realoca e colebra den un manera sigur.

Di e cuater tipo di colebra na Aruba e Cascabel ta e unico cu ta venenoso. Nunes a subraya cu ta hopi importante pa hende realisa cu e Cascabel no ta un colebra agresivo. Hende conoce e “rattlesnake”como esun cu ta mas agresivo, pero e Cascabel ta pasivo y tin miedo di hende. Si nan wak hende ta purba sconde, purba huy, y si e persona simplemente wanta su distancia e no ta bay haci nada.

El a splica cu den caso cu un Cascabel morde un persona, e prome biaha cu nan morde hopi biaha nan no ta saca veneno pasobra veneno ta costa nan hopi energia pa produci, kiermen nan ta bira un poco mas zwak cada biaha cu nan usa veneno y p’esey no ta us’e tur ora.

El a indica cu hopi biaha nan ta morde un prome biaha como warning y si nan morde atrobe e ora nan a recharge y a hinca e veneno den e djentenan y dos biaha cu nan morde si nan ta los e veneno.

Nunes a enfatisa cu si un persona tin un encuentro cu Cascabel djis keda cu distancia y si e morde toch, no drenta den panico pasobra si drenta den panico e veneno ta core mas lihe. “Keda calmo y corda cu e prome mordi hopi biaha no tin veneno. Keda calmo y bay hospital y nan tin antivenom. Si nan morde bo riba bo pia, no mara bo pia y stop e sangramento. Djis lag’e, no haci nada. Djis keda calmo y bay hospital,” el a splica.

Den e delaster decadas, el a menciona, no tin nuin reportahe di hende cu a muri door di mordi di un Cascabel. Tin caso cu hende a ser mordi, pero nada fatal, pa decadas.

Nunes a splica cu tin hende ta pensa cu si kita e maraca for di e Cascabel y e Cascabel keda bibo, nan ta hinca e maraca den nan cartera nan ta haya hopi suerte cu placa. Rangers di ACF ta haya Cascabel morto sin maraca pasobra no por kita e maraca sin cu e Cascabel muri. Na momento cu kita e maraca e Cascabel no ta muri y ta core bay bibo, pero eventualmente e ta muri sin su maraca.“E Cascabel semper ta bay muri y bo no ta bay haya mas suerte cu placa, please no haci esey,” el a suplica.